Дунёнинг “энг ночор президенти” яна бир пенсиядан воз кечди

Уругвайнинг собиқ президенти, камтар турмуш кечириши сабабли “дунёдаги энг ночор президент” деб аталувчи Хосе Мухика сенатор бўлгани учун белгиланган пенсияни олишни истамаётганини маълум қилди. 

Мухика 2015 йилда президентлик муддати якунлангач, мамлакат сенатида ишлай бошлаган. 14 августда у сенатор лавозимидан кетган. 

Мухика ушбу лавозимда 2020 йилгача қолиши мумкин эди, бироқ пенсияга кетиш илтимоси ҳақидаги мактубида “узоқ саёҳатдан кейин чарчагани”ни ёзган.

“Менинг ақлим ҳали расолигига қарамасдан, мен ҳамфикрлик ва ғоявий курашдан воз кеча олмайман”, деб айтилган Мухиканинг ўз рафиқаси – сенат бошлиғи Лусия Тополански номига ёзилган мактубида.

Ҳозирда 83 ёшда бўлган Мухика ўз вақтида умрининг 14 йилини ҳарбий турмаларда ўтказишига тўғри келган. У камтар турмуш кечириши билан танилган. Мухика президентлик муддати (2010 йил 1 мартдан 2015 йил 1 мартгача) давомида ва ундан кейин рафиқаси билан мамлакат пойтахти Монтевидео яқинидаги фермаларида яшаган.  

Мухика президентлик маошининг деярли ҳаммасини хайрия ишларига берган. Унинг фермасидан ташқари ягона мулки 1987 йилда ишлаб чиқарилган Volkswagen Beetle автомобили ҳисобланади. Мухикага 2014 йилда бу машинани 1 млн долларга сотиш таклиф қилинган, бироқ у бунга рози бўлмаган.