Муҳаммад Салоҳ: «Жозе Моуриньо «Челси»да менга ишонмаган эди»

«Ливерпуль» ҳужумчиси Муҳаммад Салоҳ 2014 йилда «Челси»да тўп сурган вақтини ёдга олиб, ушбу клубда ўйнаб кета олмагани сабабини тушунтирди.

«Менга «Челси»да жуда кам имконият берилган эди. Бу клуб сафида бор-йўғи 10 та ўйинда майдонга тушдим. Бош мураббийнинг қарорига ҳурмат билан ёндашганман, шундай бўлса-да унга кўниш қийин бўлганди. Шу боисдан ҳам кетганман.

Доимий равишда майдонга тушишни истагандим. Сабаби – футбол мен учун эҳтирос манбайи. Моуриньо билан муносабатларимиз яхши эди, аммо менга мунтазам ўйин амалиёти зарур эди», - деган Салоҳнинг сўзларини келтириб ўтди Tribalfootball.

Эслатиб ўтамиз, «Челси» ушбу ҳужумчини 2014 йил январида «Базель» клубидан 11 миллион фунтга харид қилган эди. «Кўклар» тарихидаги илк мисрлик ўйинчи 2015 йил февралида «Фиорентина»га ижарага берилди. Орадаги бир йиллик вақт давомида Салоҳ Лондон жамоасининг барча мусобақалардаги 19 ўйинида майдонга тушиб, 2 та гол урган. Салоҳ 10 та ўйин деганда Премьер-лига 2013/14 йиллар мавсумидаги учрашувлари сонини назарда тутган.