Туркиядаги АЭСнинг биринчи реактори қачон ишга туширилиши маълум қилинди

Туркия жанубидаги Akkuyu АЭСининг биринчи реакторини 2023 йилда Республика 100 йиллиги шарафига  эксплуатацияга топшириш  режалаштирилмоқда. Akkuyu Nükleer лойиҳа компанияси бош директори Юрий Галанчук "Анадолу" агентлигига шу ҳақида маълум қилган. 

Унинг сўзларига кўра, АЭС қурилиши лойиҳасини амалга оширишга доир фаол ишлар Туркия томондан барча зарур рухсатномалар олинганидан сўнг бошланган. Бош директор 2023 йил туркиялик ҳамкорлар ва умуман турк халқи учун қутлуғ сана эканини таъкидлаган. 

"Шунинг учун биз АЭСнинг биринчи реакторини 2023 йилда эксплуатацияга топширмоқчимиз. Шу билан бирга, хавфсизлик стандартларини ҳисобга олиш ҳам биз учун устувор аҳамиятга эга", - деди Галанчук.

Лойиҳа компанияси раҳбари АЭС тамал тошини қўйиш маросими учинчи апрелда бўлиб ўтганини ёдга солди, кейинги олти ойда эса лойиҳа доирасида жиддий ишлар амалга оширилган.

Унинг айтишича, тез орада Мерсин провинциясидаги қазиш ишлари тугалланади, бу йирик кемаларга керакли ускуналарни Туркия жанубига келтириш имконини беради. "Портнинг юк терминалли шарқий соҳили ноябрь ойига тайёр бўлади. Декабрда бу терминал базасида қуруқ юкларни қабул қилиш порти қурилади", - деди Галанчук.

Шунингдек бош директор иккинчи реакторга лицензия бериш муддати биринчисидан тезроқ кечишини тахмин қилган. Мутахассиснинг сўзларига кўра, АЭС қурилишида иштирок этаётган персоналнинг 85 фоизи  - Туркия фуқаролари.

Россия ва Туркия ўртасидаги АЭС қурилишига доир ҳукуматлараро келишув 2010 йилда Мерсин провинциясида "Аккую" майдонида имзоланган. Туркиядаги илк АЭС лойиҳаси умумий қуввати 4800 мегаватт бўлган тўрт энергоблокни (1200X4) ўз ичига олган. 

Таъкидлаш жоизки, 7 сентябрь куни Ўзбекистон ва Россия Бош вазирлари Абдулла Арипов ва Дмитрий Медведев томонидан Ўзбекистонда атом электр станциясини қуришга доир ҳукуматлараро ҳужжат имзоланди. АЭС Навоий ва Бухоро вилоятлари чегарасида жойлашган Тўдакўл сув омбори яқинида қурилиши кутилмоқда. «Росатом» Ўзбекистонда «3+» ВВЭР-1200 замонавий авлод станцияларини қуришни таклиф қилган. Мазкур комплекс икки энергоблокдан иборат, ҳар бирининг қуввати 1200 мегаватт бўлади. Атом электр станцияси учун дунёдаги энг хавфсиз ва замонавий эгергоблок танлаб олинган, уни 2028 йилгача ишга тушириш режалаштирилган.