Украина вазири фуқароларга «Москвани қайтариш» таклифи билан чиқди

Украина инфратузилмаси вазири Владимир Омелян украиналикларга Россияга боришни хоҳлашса, «Кубань ва Москвани қайтариш» таклифи билан чиқди. Бу ҳақда у «Громадьске ТВ»’га берган интервьюсида айтиб ўтди.

Суҳбат давомида журналист Омелянга темир йўл қатнови бекор бўлганидан сўнг, Россияга бориши керак бўлган ёки буни хоҳлаётган украиналиклар нима қилиши кераклиги ҳақида савол берган.

«Формани кийиш, автомат олиш, жанг қилишга бориш ва кейин, Кубань ҳамда Москва қайтарилганидан сўнг, Россияга бориш кераклиги ва буни жуда хоҳлаётгани ҳақида гапирса бўлади», - деди вазир.

Шунингдек, Омеляннинг тан олишича, Россияда дўстлари ҳам, қариндошлари ҳам йўқ.

Эслатиб ўтамиз, аввалроқ Украина собиқ бош вазири мамлакатда ҳокимият тез орада ўзгариши мумкинлигини айтганди.

Украина собиқ бош вазири Николай Азаровнинг билдиришича, мамлакатда олти ойдан сўнг ҳокимият ўзгаради ва ҳозирги ҳукмрон элитага тўлов учун ҳисоб тақдим этилади.