Польша раҳбари Германияни «Шимолий оқим - 2»дан воз кечишга чақирди

Германия президенти Франк-Вальтер Штайнмайер билан ўтказилган матбуот анжумани вақтида Польша президенти Анджей Дуда ГФР ҳукуматини «Шимолий оқим - 2» газ қувури қурилишида иштирок этишдан воз кечишга чақирди. Польша президентининг сўзлари «Укринформ» томонидан келтирилган.

Дуданинг маълум қилишича, ушбу лойиҳа «амалга оширилмаслиги керак». Унинг фикрича. «Шимолий оқим - 2» Европадаги энергетика мувозанатини бузади, шунингдек, Европанинг бир қатор мамлакатларига энергетика хавфсизлиги масаласида зиён етказади. Польша раҳбарининг билдиришича, газ қувури иқтисодий эмас, балки «геостратегик» лойиҳадир. Шунингдек, у Европа комиссияси «Шимолий оқим - 2»га аниқ салбий баҳо бермаганидан ҳайрон бўлди.

Польша президентининг таъкидлашича, Европа давлатлари Қўшма Штатлардан кўпроқ суюлтирилган газ сотиб олишлари керак.

«Бу ҳам стратегик сиёсий қарор», - деди Дуда.

Штайнмайер ҳамкасбининг фикрига қўшилмади ва энергетика ресурсларини сотиб олиш масаласи иқтисодий жиҳатдан ўзини оқлаши кераклигини айтди. 

Эслатиб ўтамиз, аввалроқ Польша президенти Украина ва Словакияга хавф ҳақида маълум қилганди.