Украинада Ғарбнинг ҳарбий ҳолатни жорий этишдаги ўрни айтилди

Украиналик журналист ва ёзувчиси Дмитрий Гордоннинг NewsOne телеканалига берган интервьюсида маълум қилишича, Украинадаги ҳарбий ҳолатнинг амал қилиш доираси ҳамда муддати ғарб давлатлари раҳбарларининг фикрини инобатга олган ҳолда тузатилди.

Унинг эслатишича, Керч бўғозидаги ҳодиса туфайли Украина президенти Пётр Порошенко ҳарбий ҳолатни 60 кунга эмас, балки 30 кунга жорий қилди. Унинг сўзларига кўра, бу давлат раҳбари келаси йилнинг 31 мартида бўлиб ўтиши режалаштирилган президентлик сайловларини кечиктиришни хоҳламаётгани билан боғлиқдир.

Шунингдек, Гордоннинг айтишича, Порошенкога бу масала бўйича Германия канцлери Ангела Меркель ва НАТО бош котиби Йенс Столтенберг қўнғироқ қилган.

Эслатиб ўтамиз, аввалроқ Порошенко нима учун Украина кемалари Керч бўғозини кесиб ўтганини айтганди.

Унинг сўзларига кўра, кемалар ушбу йўлдан шу сабабдан кетганки, агар улар қуруқликдан олиб ўтилганида, бу Керч бўғози Россияга тегишли эканини тан олишни англатган бўларди. Президентнинг қўшимча қилишича, бу «руслар истилоси» тан олинишини ҳам билдирарди.