Туркия зирҳли техникаларини Сурия чегарасига олиб келди

Туркия ҳарбийлари Сурия билан чегарадош Килис вилоятидаги ҳарбий гуруҳини зирҳли техникалар билан кучайтирмоқда, деб хабар берди NTV телеканали.

Хабар қилинишича, зирҳли техникалар Туркия президентининг мамлакат суриялик курдлар мудофаа кучларига (YPG) қарши ҳарбий операция ўтказишга тайёрлигини билдирганидан сўнг келтирила бошлаган.

Анқара Вашингтонни Сурия шимоли-шарқини назорат қилиб турган курд гуруҳларига қурол етказиб беришда бир неча бор айблаганди. Туркия YPG гуруҳини террорчилик ташкилоти деб эълон қилинган Курдистон ишчи партияси билан алоқадорликда айблаб келади.