Нобель лауреати Надия Мурод мукофотни шифохона қуриш учун сарфлайди

Ослода Конго Демократик республикасидан бўлган гинеколог шифокор Денис Муквеге билан 2018 йилги Нобель тинчлик мукофотини қабул қилиб олган ироқлик Надия Муроднинг маълум қилишича, Ироқда шифохона қурилиши учун пул мукофотини сарфлаш ниятида. Бу ҳақда Рейтер агентлиги хабар қилмоқда.

«Мен Нобель тинчлик мукофоти учун олган пулга Синжор шаҳрида шифохона қураман. Мақсадим - касал одамлар, айниқса, ИШИД жангарилари томонидан жинсий зўравонликларга учраган бевалар ва аёлларга ёрдам бериш», - дея маълум қилди Мурод Синжорда чиқиш қилиб.

Агентлик маълумотига кўра, у, шунингдек, Ироқ ва Курдистон ҳукуматларига ўз режаларига қўшилишгани учун миннатдорлик билдириб, тез орада шифохонани қуриш учун гуманитар ташкилотларга мурожаат қилишини айтди.

Надия Мурод 1993 йилда туғилган, у Шимолий Ироқдан. Мурод ИШИД террористик гуруҳида жинсий қулликни бошидан ўтказган ва бугунги кунда уруш зўравонликлари қурбонларига эътибор жалб қилиш бўйича жамоат ишларида фаол қатнашиб келади. Надия ИШИД зўравонлигидан жабр кўрган 3 минг ёзид қиз ва аёлларидан бири эди. Мукофот топширилганидан сўнг, у жинсий зўравонлик қурбонлари билан ишлаш учун пул ўтказишини хабар қилди.

2018 йилда ҳар бир номинация бўйича Нобель мукофоти миқдори 9 миллион швед кронаси (бир миллион АҚШ доллари)ни ташкил этди.