Эрдўған: Трамп Туркиянинг Суриядаги янги ҳарбий амалиётини маъқуллаган 

Туркия президенти Ражаб Тоййиб Эрдўған АҚШ президенти Дональд Трамп Туркиянинг Сурияда янги амалиётни ўтказишини маъқуллаганини маълум қилди. Бу амалиёт Фрот дарёсидан шарқ томонда жойлашган курд тузилмаларига қарши ўтказилмоқчи.   

“Сурияда ИШИД қолмади, ундан баҳона сифатида фойдаланилмоқда. Биз у ерда террорчилик йўлагининг ташкил этилишига йўл қўймаймиз. Биз томондан Сурияда учта операция ўтказилди, энди навбат Фротдан шарқ томонга келди. Фротнинг шарқидаги террорчиларни ҳимоя қилаётганларга мурожаат қилмоқчиман: сиз хато қилмоқдасиз, бундан воз кечинг”, деб айтган Эрдўған Кўнядаги намойишдаги нутқида.

Эрдўғаннинг айтишича, турк ҳарбийлари Сурияда охирги террорчи йўқ қилинмагунча ва “озод сайловлар” ўтмагунча унинг ҳудудини “титиб чиқади”. “Биз Сурия ҳудудида 500 кмлик чегарамиз бўйлаб АҚШ ҳарбийларига зиён етмайдиган ҳолда исталган вақтда амалиётни бошлашимиз мумкин”, деб ўз сўзларини якунлаган Эрдўған. 

Эрдўған суриялик курдлар отрядларига қарши янги амалиёт бошланиши ҳақида биринчи марта 12 декабрда сўз очган.

Вашингтонда бунга салбий муносабат билдирилган. Жумладан, Пентагон вакили Шон Робертсоннинг таъкидлашича, Туркиянинг Сурия шимоли-шарқида бир томонлама ҳарбий ҳаракатлар олиб бориши номақбул ҳисобланади.