Рэмзи «Арсенал»дан кетади. Эмери ва «Ювентус» тасдиқлади

«Арсенал» бош мураббийи Унаи Эмери Англия Кубогининг 1/32 финали доирасида «Блэкпул»га қарши кечадиган учрашув олдидан бўлиб ўтган матбуот анжуманида Аарон Рэмзи борасидаги миш-мишларга ойдинлик киритди.

«Рэмзими? Мен у ҳар куни «Арсенал» машғулотларида қаттиқ меҳнат қилишини истардим, у «Блэкпул»га қарши ўйинга ҳам жиддий тайёрланишини истардим. Ўйлайманки, у ҳозир фақат ўйин ҳақида ўйламоқда. Сешанба куни у «Фулҳэм» дарвозасига гол урди. У 15 дақиқа ичида мақсадига эришди. Мен ундан ҳамиша шундай ўйин кўрсатишини кутаман. Шу билан бирга у ўз келажаги ҳақида қайғуриши ҳам керак. Менга қолса у ҳамиша «Арсенал»да бўлишини хоҳлайман. Мавсум охирида Рэмзи қолиш ёки кетиш масаласида қарор қабул қилиши керак бўлган вақт келади», дея Эмерининг сўзларини келтирган Mirror нашри.

Бундан аввалроқ «Ювентус» спорт директори Фабио Паратичи клуб Аарон Рэмзига қизиқаётганини тасдиқлаганди. 

«Рэмзи – кучли жамоада тўп сурувчи жуда зўр ўйинчи. Унинг шартнома муддати ниҳояланиб боряпти ва биз бозордаги вазиятни, унинг атрофида бўлаётган воқеликларни кузатиб боряпмиз.

У июль ойидан бошлаб «Ювентус»га қўшиладими? У ҳозир «Арсенал» аъзоси, трансфер бозорида эса биздан бошқалар ҳам бор», – деган Паратичидан иқтибос келтирди Corriere dello Sport.

Sport Mediaset маълумотига кўра, уэльслик футболчи «Ювентус» билан оғзаки келишувга эришган.

Айни вақтда 28 ёшда бўлган футболчининг лондонликлар клуби билан шартномаси 2019 йил ёзига қадар тузилганди, футболчи мавсум якунида клубни эркин агент сифатида тарк этиши ҳам мумкин.

28 ёшли хавбек АПЛнинг бу мавсумида 18та ўйинда майдонга тушиб, иккита гол ва олтита голли узатмага муаллифлик қилди. Унинг амалдаги шартномаси 2019 йил ёзига қадар, клуб у билан янги шартнома бўйича келишувга эриша олмади, энди футболчи бошқа клублар билан мустақил музокаралар ўтказиш ҳуқуқига эга. Унга айни вақтда «ПСЖ» томонидан ҳам қизиқиш мавжуд.

Рэмзи айнан туринликлар клубига ўтишни истаётгани, «Юве» унга йилига 6,5 млн евро миқдорида маош тўлаш назарда тутилган 4 йиллик шартнома таклиф этаётгани ҳақида хабарлар тарқалган.