Помпео Украинада мустақил черков ташкил этилганини «тарихий ютуқ» деб атади

АҚШ давлат котиби Майк Помпеонинг маълум қилишича, Украинадаги янги православ черковига автокефалия тақдим этилиши мамлакат учун «тарихий ютуқ» ҳисобланади. Помпеонинг баёноти Давлат департаменти сайтида эълон қилинди.

Помпео сўзларига кўра, 6 январь куни Украина черковининг мустақиллиги ҳақида берилган баёнот Украина учун «тарихий ютуққа» айланди. Давлат котиби фикрича, бу воқеа жуда муҳим аҳамиятга эга, сабаби ҳозирги пайтда Украина «ўз келажаги қандай кўринишда бўлишини аниқлашга» ҳаракат қилмоқда.

Шу билан бирга, Помпеонинг таъкидлашича, Украина ҳукумати фуқароларнинг дин эркинлигига бўлган ҳуқуқини ҳурмат қилиши керак.

Эслатиб ўтамиз, аввалроқ Украина ўзининг мустақил православ черковини ташкил этганди.