Остонада 5 опа-сингил ёнғинда ҳалок бўлди

Остонадаги уйлардан бирида 4 февралга ўтар кечаси юз берган ёнғин 5 опа-сингилнинг ҳаётига зомин бўлди. Опа-сингиллардан кенжаси бор-йўғи 3 ойлик бўлган. 

Қизлар 2006, 2009, 2014, 2016 ва 2018 йилларда туғилган бўлган.

Опа-сингиллар оиласи Кўктал-1 массивида жойлашган кичик вақтинчалик уйда 4 йил яшаган. Уй яқинида яна шундай уйлардан бир нечтаси бўлган. Уларда ушбу оиланинг яқинлари яшаган.

Уйда кўмирда ишловчи печка қўлланган. Оила яқинларининг маълум қилишича, уларнинг уйида ҳам шундай печка туради ва бу печкалар билан аввал муаммолар бўлмаган.

Опа-сингиллардан тўнғичи яқин орада 13 ёшга тўлиши керак бўлган. Ҳозирда қизларнинг яқинлари уларнинг ота-оналарига далда бериш учун йиғилишган. Қизлар 5 февралда дафн қилинадилар.

Оила кўп фарзандли бўлгани сабаб нафақа олган. Қизлардан икки нафари 4- ва 6-синфларда ўқишган, 2014 йилда туғилган яна бир қизча болалар боғчасига қатнаган.

Яқинларининг айтишича, қизларнинг онаси фожиа юз берган кун тунги сменага ишга чиққан. Қизлар билан уларнинг отаси бўлган, бироқ у ҳам ишига чақиртириб олинган. 

Оила яқинлари уйдан хабар олиб туришган. Охирги марта улар уйни тунги соат 2да текширишганда ҳаммаси осуда, чироқ ёниқ бўлган. Бироқ бир соат ўтгач кучли ёнғин бошланган.

Қутқарувчилар воқеа жойига чақириқдан 7 дақиқа ўтиб етиб келишган, бироқ бу вақт ичида уй тўлиқ ёниб бўлган. Ўт ўчирувчилар ёнғинга қарши 40 дақиқа курашишган. Уйлар бир-бирига яқин жойлашгани сабаб аланга қолган уйларга ўтиб кетиши хавфи бўлган.

Қизларнинг яқинларига ҳамдардлик билдиргани Остона ҳокими Бахит Султанов келган. У ёнғин жойини кўздан кечириб, дафн маросимини ўтказишда ёрдам беришга ваъда берган.

Қизларнинг ота-онаси билан руҳшунослар ва ижтимоий хизматлар ходимлари иш олиб боришмоқда.

“Мактаб томондан давлат ёрдами дастури доирасида кўмак кўрсатилди. Ўқитувчиларнинг айтишича, қизлар дарсларни қолдиришмаган, ўзларини одобли тутишган, ҳамма билан иноқ бўлишган. Оила кам таъминланган бўлмаган, чунки ота-онанинг иккисининг ҳам даромади бўлган. Қизлар доимо ораста кийинишган”, деб айтган Остона акимати матбуот котиби Эльвира Жургенбаева.

Остона фавқулодда вазият департаментида маълум қилинишича, 2018 йилда пойтахтда 699 та ёнғин юз берган. Уларда 10 киши, жумладан бир бола ҳалок бўлган. Жорий йил бошидан эса 69 та ёнғин содир бўлган. Ҳалок бўлган қизлар жорий йилдаги ёнғинларнинг илк қурбонлари бўлган.