Венесуэлага гуманитар юклар ортилган машиналар ўтказилмади

Венесуэлага аталган гуманитар юк ортилган илк 4 та машина Колумбия ва Венесуэла чегарасига етиб келди, бироқ Венесуэла томонидан кўзни ёшлатувчи газ билан “кутиб олинди”. Бу ҳақда VPI TV канали хабар берди. 

Юк машиналарнинг ҳар томонидан одамлар осилиб олган бўлган, улар икки давлатни боғловчи кўприкнинг Колумбия томонидан ўтган, бироқ кейин Венесуэла полицияси томонидан йўли тўсилган. 

Колумбия президенти маъмуриятининг маълум қилишича, чегарада газ қўлланиши оқибатида 285 киши яраланган. Бир нечта машина ёқиб юборилган, қолган машиналарни эса Колумбияга қайтариш буюрилган. Машиналар Кукута шаҳридаги гуманитар юкни йиғиш марказига қайтади. 

Шунингдек, Бразилия томонидан олиб кирилмоқчи бўлган гуманитар юк ҳам ўтказилмаган. Таъкидланишича, илк юк машина венесуэлалик ҳарбийлар тўсиқ қўйган жойгача етиб борган. У мамлакатга ўтказилмагач, Бразилия ҳудудига қайтиб кетган.

Намойишчилар гуманитар юкни олиш учун чегарага йўл олишган. Бироқ улар ва полиция ўртасида тўқнашув чиққан. Бу ерда ҳам кўзни ёшлатувчи газ қўлланган. “Жиноий форум” ноҳукумат ташкилоти маълумотларига кўра, чегарада 4 киши ўлдирилган, 24 киши яраланган.