«Челси» Кепани жазолади

«Челси» раҳбарияти Англия Лигаси Кубоги финалида «Манчестер Сити»га қарши кечган ўйин охирида жамоа бош мураббийи Маурицио Сарри ва дарвозабон Кепа Аррисабалага ўртасида юзага келган вазият бўйича текширув ишларини якунлади.

Финал ўйинида овертаймлар якунланиб бораётганида Маурицио Сарри дарвозабон Кепа Аррисабалага ўрнига Вилли Кабальерони туширмоқчи бўлганида, Кепа майдонни тарк этишни истамаган ва бу билан Саррининг ғазабини қўзғаган эди. Пенальтилар сериясида «Манчестер Сити ғалаба қозонди.

Ўйиндан кейин Сарри дарвозабон билан ўртасида тушунмовчилик бўлганини ва унга ҳеч қандай эътирози йўқлигини айтди. Мураббий сўзларига қараганда, у Кепанинг мушаклари тортишган деб ўйлаган. Кейинчалик дарвозабон билан гаплашиб, бундай эмаслигини аниқлаган.

Аввалига клуб дарвозабонни бу хатти-ҳаракатлари учун жазоламасликка қарор қилгани айтилганди.

Клуб матбуот хизмати хабарига кўра эса, футболчи бир ҳафталик маоши миқдорида жаримага тортилган. Пуллар Chelsea Foundation хайрия фондига йўналтирилади.