Еврокомиссия BMW, Daimler ва Volkswagen’ни картел келишувида айблади

Еврокомиссия Германиянинг BMW, Daimler ва Volkswagen автоконцернларини Европа бозорида автомобиллардан зарарли моддалар ажралиб чиқишини камайтирадиган технологиялар ривожланиши ва жорий этилишини чегаралаш мақсадида картел келишуви тузганликда айблади. Суриштирув якуни компанияларни йирик жарималарга олиб келиши мумкин.

Еврокомиссиянинг гумонича, BMW, Daimler ва VW 2006 йилдан 2014 йилгача бензин ва дизел двигателларидан чиқадиган газларни тозалаш технологияси ривожлантиришдаги рақобатни чеклаш учун ҳамкорлик қилишган. Компаниялар техник стандартларни ўзаро мувофиқлаштириш орқали Евроиттифоқнинг монополияга қарши қонунчилигини бузишган. 

Компанияларга Еврокомиссиянинг дастлабки хулосаси жўнатилган. Улар 10 ҳафта ичида эътирозларга жавоб қайтаришлари лозим.

Картел ҳақида маълумот берган Daimler «Евроиттифоқ билан фаол ҳамкорлик қилаётганини» ва жарима тўлашни кутмаётганини билдирган.

Volkswagen Еврокомиссия эътирозларини ўрганиб чиққанидан сўнг жавоб қайтаришини маълум қилган.

BMW эса келишув бўлганлигини рад этган ва айбловларни инкор қилишини билдирган.