Сув таъминоти ва канализация тизими объектларида технологик аудит ўтказилади

Норматив-ҳуқуқий ҳужжатлар лойиҳалари муҳокамаси порталида Вазирлар Маҳкамасининг “Ичимлик сув таъминоти ва канализация тизими объектларида технологик аудит ўтказиш тўғрисида”ги қарори лойиҳаси жойлаштирилди.

Ҳужжат билан Ичимлик сув таъминоти ва канализация тизими объектларида технологик аудит ўтказиш тартиби тасдиқланиши мумкин.

Ўзбекистон Республикаси Уй-жой коммунал хизмат кўрсатиш вазирлиги ва Ўзбекистон Республикаси Вазирлар Маҳкамаси ҳузуридаги Ичимлик сувдан фойдаланишни назорат қилиш давлат инспекциясининг, мазкур инспекция қошида ичимлик сув таъминоти ва канализация тизими объектларида технологик аудит ўтказишга ихтисослаштирилган “Коммунал аудит” давлат унитар корхонасини ташкил этиш бўйича таклифлари маъқулланиши мумкин.

Қуйидагилар “Коммунал аудит” ДУКнинг асосий вазифалари ҳисобланади:

ичимлик сув таъминоти ва канализация хизматлари кўрсатишга дахлдор бўлган барча жараённи технологик аудитдан ўтказиш;

технологик аудит ўтказиш тартиблари ва режаларини ишлаб чиқиш ҳамда барча манфаатдор идоралар билан келишиш;

зарурий ҳолларда, технологик аудитдан ўтказишда иштирок этиш учун давлат бошқаруви, маҳаллий ҳокимият ва ўзини-ўзи бошқариш органларини шартнома асосида жалб этиш;

технологик аудит ишларини шартномавий муносабатлар асосида ва сифатли ўтказиш;

сув таъминоти ва канализация соҳасида давлат капитал қўйилмалари ва хорижий молия институтларининг маблағлари эвазига қуриладиган ҳамда реконструкция қилинадиган ишларни манзилли рўйхати ва дастурларини шакллантиришда иштирок этиш, бу борада жойларда амалга оширилаётган ишларни ўрганиш;

ўтказилган технологик аудит ва ўрганиш натижалари бўйича муаммолар ва уларни бартараф этиш бўйича аниқ инновацион таклифларни тақдим этиш.

Барча технологик аудит ўтказишга ихтисослаштирилган корхоналар томонидан ичимлик сув таъминоти ва канализация тизими объектларида технологик аудит ўтказиш тартибига тўлиқ амал қилиниши белгиланади.

Сув таъминоти ва канализация тизими объектларини технологик аудитдан ўтказиш тартибига кўра, сув таъминоти ва канализация тизимларида аудит ўтказишнинг вазифалари қуйидагилар:

объектлар, техника-технологиялар, асбоб ва ускуналарнинг белгиланган талабларга мувофиқлиги ўрганиш ҳамда баҳолаш;

объектларда энергия ва сув ресурсларини тежаш ҳолатини ўрганиш ҳамда баҳолаш;

объектлар, техника-технологиялар, асбоб ва ускуналарнинг носозлик ва хатоликларини аниқлаш ҳамда баҳолаш;

тегишли корхона ва ташкилотлар томонидан техник жараённи такомиллаштириш, техник ва маънавий эскирган объектлар, техника-технологиялар, асбоб ва ускуналарнинг фойдаланишдан чиқаришга қаратилган тадбирларни ишлаб чиқиш;

тегишли корхона ва ташкилотлар томонидан энергия тежовчи техника-технологиялар жорий этишга қаратилган тадбирларни ишлаб чиқиш.

Мазкур Тартиб мулкчилик шаклидан қатъий назар барча ичимлик сув таъминоти ва канализация хизматлари кўрсатиш корхоналари учун татбиқ этилади ҳамда улардаги объектлар, техникалар, асбоб ва ускуналарни аудитдан ўтказиш тартибини белгилайди.

Аудит, Ўзбекистон Республикаси Вазирлар Маҳкамаси ҳузуридаги Ичимлик сувдан фойдаланишни назорат қилиш давлат инспекцияси томонидан тегишли вазирлик ва идоралар ходимлари ёки бу борадаги мутахассислар жалб этилган ҳолда ўтказилади.

Техник ва вақт бўйича имкониятлари чекланган ҳолатларда Давсувинспекция буюртмасига асосан ҳамда сув таъминоти ва канализация ташкилотлари ихтиёри бўйича Давсувинспекция розилиги бу борада ихтисослашган корхоналар томонидан аудит ўтказилиши мумкин.

Фақатгина аудит объектларини қийматини аниқлаш ва иншоотларнинг молиявий самарадорлигини аниқлаш доирасида аудит ўтказилаётган сув таъминоти ва канализация тизимлари иншоотларининг молиявий ҳолатини ўрганишга йўл қўйилади.