Шимолий Корея раҳбари Ким Чен Ин илк марта Россияга ташрифини амалга оширмоқда. Владивостокда унинг зирҳли поездини Россия делегацияси қизил гилам тўшаган ҳолда кутиб олди. 25 апрель куни Русский оролида жаноб Ким Россия президенти Владимир Путин билан учрашиб, музокаралар ўтказади.
Ким Чен Иннинг зирҳли поезди Россия чегарасини сешанба тонгида кесиб ўтди. У чегарадаги Хасан темир йўл станциясида тўхтади ва ўзига тутилган каравайдан (юмалоқ бўлка нон) татиб кўрди.
Владивосток вокзалида темир йўл ходимлари унинг йўлига қизил пойандоз тўшашди.
Шимолий Корея доҳийсини вокзалнинг ички майдонида ҳарбий оркестр қарши олди.
Приморье ўлкасига келган КХДР раҳбари Россияга боришни орзу қилгани ҳақида гапирди.
Жаноб Кимга РФнинг Узоқ Шарқ масалалари бўйича министри Александр Козлов ҳамроҳлик қилмоқда.
Владивосток икки давлат раҳбарлари учрашуви арафасида Россия ва КХДР байроқлари билан безатилган.
Вокзалда меҳмон олдиндан Владивостокка етказилган лимузинига ўтирди ва автомобиль билан бирга югурадиган тансоқчилари қуршовида ўзи учун ажратилган қароргоҳга йўл олди.
Уни Россия миллий таомлари карам шўрва ва чучвара билан меҳмон қилишади.
