Нетаньяху Исроил Эроннинг ядро қуролига эга бўлишига йўл қўймаслигини айтди

Фото: Debbie Hill/Pool via AP

Исроил бош вазири Биньямин Нетаньяху Исроил Эроннинг ядро қуролига эга бўлишига йўл қўймаслигини айтди, деб хабар берди Reuters агентлиги.

"Биз Эроннинг ядро қуролига эга бўлишига имкон бермаймиз. Бизни ўлдиришлари мумкин бўлганларга қарши курашишда давом этамиз", деган Нетаньяху.

2018 йил 8 майда АҚШ президенти Дональд Трамп Теҳроннинг ядровий ишлаб чиқаришларни чеклаши эвазига БМТ Хавфсизлик кенгашининг санкцияларини бекор қилувчи шартномадан чиқишини билдирди. Ўтган йил ноябрда АҚШ Эроннинг нефть секторига қарши санкцияларни қайта тиклади.

Чоршанба куни Эрон президенти Ҳасан Руҳоний Теҳрон 60 кун давомида ядровий келишувнинг икки банди бўйича шартларни бажармаслигини эълон қилди. Агарда ядровий келишув иштирокчилари ўз мажбуриятларини бажармайдиган бўлса, Эрон уранни бойитиш ва Аракдаги ядровий реакторни модернизация қилиш ишларини бошлайди.