«Шаҳарликлар»нинг янги таянчи. Уни янги Бускетс деб аташади

«Манчестер Сити» ўзининг ёздаги энг асосий трансферини амалга оширди. Бу трансфер амалга ошиши ҳақда ўтган мавсумдаёқ миш-мишлар пайдо бўлганди. Ҳа, гап Родри ҳақида кетмоқда.

«Сити» майдалашиб ўтирмади-да, «Атлетико»нинг «оғзига сиққанини» тўлади ва таянч зонасида дунёнинг энг зўр футболчиларидан бирини қўлга киритди. Родри «Манчестер Сити» учун жуда муҳим футболчи эди, шу боис «Шаҳарликлар» бу трансфер учун савдо қилиб ўтиришмади.

Нега унинг келиши Пепнинг жамоаси учун шунчалик муҳим эди?

«Жаноб Муборак, менга шу йигит керак...»

«Бавария» президенти Уле Хёнес Гвардиола «Манчестер Сити»да қандай футболчи сотиб олиши ҳақида ҳазиломуз гап айтганди: «У «Сити»нинг хўжайини билан бирга овқатланаётган вақтда унга олиб келмоқчи бўлган футболчиси ҳақида бир нечта видео қўйиб беради ва шайх ўша ернинг ўзида трансфер учун пулни ўтказиб беради. Эртасига эса у бирор мамлакатга кетаётган газ трубасидаги винтелни озгина бураб қўяди ва ҳаммаси ўз ўрнига тушади».

Гвардиола сўраган футболчиларнинг деярли барчаси «Манчестер Сити»да пайдо бўлаётганини инобатга олсак, бу гаплар ҳақиқатга яқин. Чунки Пеп раҳбариятнинг ишончини қозониб бўлган.

Родрининг трансфери Гвардиола учун шунчалик муҳим эдики, у «Атлетико» футболчисининг ҳаракатлари тасвирланган видео тайёрлаб ҳам ўтирмаган, менимча. Мураббий шунчаки клуб хўжайинининг олдига кириб шундай деган: «Жаноб Халдун, Бускетсни ололмадик, энди Родрини олмасак бўлмайди. Менга шу йигит керак...». Гвардиолада ҳар биз чизиқда бир нечтадан футболчи бор, лекин таянч зонаси ҳақида бундай деб бўлмайди. Шу боис Родрининг келиши клубни фақат кучайтиради.

Фернандиньо энди алмаштириб бўлмас футболчи эмас

«Манчестер Сити» Европанинг энг зўр клуби бўлмаслиги мумкин, лекин Гвардиола жамоаси захира ўриндиғи борасида тенгсиз десак, муболаға бўлмайди. Масалан, Гвардиоланинг ярим ҳимоясида шунчалик футболчи кўпки, у ҳар ўйинда бошқача футболчи туширавериб, футбол-менежер ўйинлари шайдоларини «безор қилган». «Сити» ярим ҳимоясида Фернандиньо билан кимлар ўйнашини жамоанинг ашаддий мухлислари ҳам тахмин қила олишмайди. Ҳа, фақат Фернандиньо ўзгармас футболчи сифатида ўйнашига одатланганмиз.

Бразилиялик футболчи шахсан менинг фикримча, дунёдаги энг кучли таняч ярим ҳимоячиларидан бири. 34 ёшга кирган Фернандиньо ўз ишини ҳамон аъло даражада бажариб келади. Аммо унинг фаолияти якунига етиб бормоқда ва жамоа янги футболчини олиб келиши керак эди. Бундан ташқари рақобатнинг йўқлиги ҳар қандай футболчини хотиржамликка ундайди ва бу ўйин сифатига таъсир қилади.

Фернандиньо қўпол футболчи бўлгани учун кўп марта қизил карточка олиб жамоасини қийин аҳволга тушириб ҳам қўйган. Родри бу борада намунали футболчи. Унинг ҳаракатлари ҳам Гвардиоланинг услубига кўпроқ мос келади. Фернандиньо инглизча қизиққонлик билан ҳаракат қилади, Родри эса ақлли футбол вакили. Унинг узатмалари жуда аниқ.

Янги Бускетс

Родрини анчадан буён «янги Бускетс» деб атаб келишади. Чиндан унинг ҳаракатлари футбол одамлари замонавий футболнинг тенгсиз таянч яримҳимоячиси деб атайдиган Серхио Бускетснинг ўйинларини эслатиб юборади. Ўтган йил «Вильярреал»дан «Атлетико»га келиб қўшилган футболчи бежизга марказни ўзиники қилиб олмади. Албатта, «матрасчилар»нинг марказдаги асосий футболчиси Коке, лекин айнан Родрининг ўйини чиройлироқ. У тўпни қадрлайди ва деярли хато узатма амалга оширмайди.

Бускетс даражасига чиқиш бир қарашда имконсиздек кўринади, лекин от изини той босар. 10 йил ичида Испания миллий жамоасида кўп нарсалар ўзгарди, мураббийлар келиб кетишди, сардорлар алмашди, лекин Бускетс ҳамон асосий таркибда. Чунки марказда у каби мукаммал ўйнаш бошқа футболчилар учун ҳозирча имконсиз бўлиб қолмоқда. Испанияликлар марказда Бускетснинг ўрнини айнан 22 ёшли Родри эгаллашини кутишмоқда.

Родри ўтган мавсумда бир кўрсаткич бўйича Бускетсни ҳам ортда қолдиргани кўп нарсани англатади. «Реал Сосьедад»га қарши ўйинда Родри 42 марта тўпни шерикларига узатган ва унинг узатмалар аниқлиги 100 фоизга тенг бўлган. Ла Лиганинг ўтган мавсумида бир ўйинда 40тадан кўп узатмани амалга оширган ҳеч бир футболчи 100 фоизлик кўрсаткичга эга бўлмаган.

Одатда таянч ярим ҳимоячилари жисмонан бақувват бўлишади ва улар ҳужумни бузиш билан машғул бўладилар. Лекин Родрининг устунлиги унинг мушаклари эмас. У ақлли футбол кўрсатади. Родриго ҳатто ёшлигида жисмоний ҳолати яхши эмаслиги боис «Атлетико» ёшлар жамоасидан кетишга мажбур бўлган. Ҳа, кўп пул харжламайдиган «Атлетико» ўз тарбияланувчиси ҳисобланган Родри учун «Вильярреал»га 25 миллион евро берганди.

Албатта, «Сити»нинг янги футболчиси камчиликдан холи эмас. Унинг камчиликларини биз эмас, устози Диего Симеоне санаганди: «Мен у билан кўп тортишаман ва ўсиши кераклигини айтаман. Родри жамоа олдинга ҳаракат қилиши учун кўпроқ олдинга тўп узатиши керак. Менимча, қанотдаги Хуанфранга 20 марта тўп узатгандан кўра 6-7 марта очиқ зоналарга узатма амалга оширган яхшироқ. Масалан, Бускетс ҳеч қачон 30 марта олдинга пас бермайди. У ўйин давомида 12-14та узатма билан сизга бўш жой очиб беради. Родрининг устунлиги шундаки, у ҳавода яхши ўйнайди ва тўпни жамоага олиб беришда яхши ҳаракат қилади. У ҳеч қачон диққатни йўқотмаслигини ҳам таъкидлаш керак».

Родри каби футболчилар жамоадаги балансни ушлаш учун жуда муҳим. Бундай футболчилар ҳужум йўналишини белгилаб беради ва дирижёрлик вазифасини бажаради. Гвардиоланинг ўзи марказий ярим ҳимояда ўйнарди, шу боис у жамоаларида марказ кучли бўлишини хоҳлайди. «Сити»да энди кучайтириш керак бўлган яна бир чизиқ қолди. Бу чап қанот ҳимояси.

Александр Зинченко ва Бенжамин Менди ёмон футболчилар эмас, лекин бу футболчиларнинг барқарор ўйин кўрсатмагани боис Гвардиола чап қанотда таянч ярим ҳимоячиси Фабиан Дельфни ўйнатишга мажбур бўлганини ҳам кўрганмиз. Аммо бу чизиқда қимматбаҳо трансфер бўлмаса керак, чунки жамоа доим жароҳатини тузатиш билан вақт ўтказадиган Менди учун катта пул сарфлаб бўлган...

Ўткир Жалолхонов