Жанубий Корея Япониядан савдо чекловларини олиб ташлашни талаб қилди

Жанубий Корея Токиода бўлиб ўтган музокараларда Япониядан стратегик аҳамиятга эга хомашёларга киритилган экспорт чекловларини олиб ташлашни талаб қилди. Бу ҳақда Жанубий Корея делегацияси вакилларидан бири маълум қилди.

"Биз чекловлар муносабати билан чуқур таассуф билдирдик ва уларни олиб ташлашни талаб қилдик", - деди у Kyodo агентлиги мухбирига. 

1 июль куни Япония яримўтказгичлар ва гаджетлар экранлари ишлаб чиқаришда зарур бўладиган уч турдаги хомашё экспорти устидан назоратни кучайтирди. Эндиликда уларни олиш учун алоҳида рухсатнома керак бўлади.

Токио ва Сеул ўртасидаги муносабатлар 2018 йил кузда, Корея олий суди Япониянинг Nippon Steel & Sumitomo Metal компаниясига Иккинчи жаҳон уруши даврида тўрт нафар кореялик ишчини мажбуран ишлатгани учун товон тўлашга ҳукм чиқарганидан сўнг кескинлашганди. Япония бу масала 1965 йилда ҳал этилганини таъкидлаб, суд қарорини бажаришни рад этганди.