Америка Қўшма Штатлари Ҳамза бин Лодин вафот этгани тўғрисида разведка маълумотларига эга бўлди. У «Ал-Қоида» террорчилик ташкилоти асосчиси Усома бин Лодин ўғли ҳисобланади. Бу ҳақда NBC телеканали АҚШ маъмуриятидаги уч мустақил манбасига асосланган ҳолда хабар қилмоқда.
«АҚШ «Ал-Қоида» етакчисининг эҳтимолий вориси ва Усома бин Лодин ўғли ўлгани ҳақида разведка маълумотларини қўлга киритди», - дейилади хабарда. Америка мулозимлари унинг ўлимида Американинг эҳтимолий иштирокига доир маълумотлар тақдим этмаган.
Аввалроқ, АҚШ Ҳамза бин Лодин ҳақида ахборот учун 1 млн доллар мукофот берилишини эълон қилган эди. Унга нисбатан АҚШ санкциялари ҳам кучда эди. У 2015 йил августидан расман «Ал-Қоида» аъзоси ҳисобланиб, ғарбий мамлакатлар пойтахтларига ҳужум қилишга чақириб келган.
