ХТВ халқ таълими тизимида 27та бизнес лойиҳани таклиф этмоқда

Ўзбекистон Республикаси Халқ таълими вазирлиги тизимда давлат-хусусий шериклик лойиҳаларини амалга ошириш учун сармоядорлар ўртасида танловлар эълон қилди.

Вазирлик ўз расмий сайтида давлат-хусусий шериклик (ДХШ) лойиҳаларини амалга ошириш бўйича 27 та эълонни чоп этди. Лойиҳалар 8 вилоятда ва Тошкент шаҳрида амалга оширилади.

Лойиҳаларнинг 5 тасида бўш ер участкаларида спорт мажмуалари, шунингдек 22 тасида эса нодавлат умумий таълим муассасаларини ташкил этиш кўзда тутилган.

Танлов талабларига кўра, ДХШ объектлари ғолибларга эълонда кўрсатилган муддатга қадар беғараз фойдаланиш учун тақдим этилади.

Лойиҳалар доирасида ҳамкорлар ижтимоий кўмакка муҳтож бўлган бир гуруҳ ўқувчиларни ўқитиш, биноларни қуриш ва реконструкция қилиш ҳамда мактабларнинг моддий-техник базасини янгилаш бўйича мажбуриятларни қабул қилиши керак. Шу билан бирга, лойиҳа ҳамкори битим амал қилиш муддати давомида ДХШ объектининг асосий фаолият турини ўзгартирмаган ҳолда фойдаланиши шарт.

Танловда иштирок этишни истаган тадбиркор ва сармоядорлар жорий йилнинг 12 сентябрь кунига қадар қуйидаги манзил бўйича мурожаат этиши мумкин: Ўзбекистон Республикаси Халқ таълими вазирлиги, 100031, Тошкент шаҳри, Яккасарой тумани, Миробод кўчаси, 14-уй.

Танлов шартлари ва унда иштирок этиш бўйича маълумот олиш учун вазирликнинг Мактабларнинг истиқболли моделлари ва давлат-хусусий шериклик бошқармасига мурожаат этиш мумкин.