БААнинг Ўзбекистондаги янги элчиси тайинланди

Фото: ТИВ матбуот хизмати

2019 йилнинг 8 октябрь куни Ўзбекистон Республикаси ташқи ишлар вазири Абдулазиз Комилов Бирлашган Араб Амирликларининг фавқулодда ва мухтор элчиси этиб тайинланган Саид Матар Султан ас-Сири ал-Қамзийни қабул қилди.

Вазир Элчининг ишонч ёрлиқлари нусхаларини қабул қилар экан, уни юқори ва масъулиятли лавозимга тайинлангани билан табриклаган ва муваффақиятлар тилаган.

Суҳбат чоғида президент Шавкат Мирзиёевнинг жорий йил март ойида БААга расмий ташрифи ва Ўзбекистон - БАА музокаралари давомида эришилган келишувлар нуқтаи назаридан икки томонлама муносабатларнинг ҳолати ва истиқболлари кўриб чиқилди.

Учрашувда ҳамкорликнинг бошқа масалалари ҳам муҳокама қилинди, шунингдек, халқаро ва минтақавий муаммолар юзасидан фикр алмашилди, дейилади ТИВ хабарида.

Бундан олдин, БААнинг Ўзбекистондаги фавқулодда ва мухтор элчиси Муҳаммад Ҳариб Ал-Муҳайрибий дипломатик фаолиятини якунлаётгани маълум қилинганди.