«Давергеодезкадастр» тўққиз ойга белгиланган 10та вазифадан 4тасини бажармаган

Ўзбекистон Республикаси Олий Мажлиси Сенатининг Аграр, сув хўжалиги масалалари ва экология қўмитасининг жорий йил 10 октябрь куни бўлиб ўтган мажлисида Ўзбекистон Республикаси Ер ресурслари, геодезия, картография ва давлат кадастри давлат қўмитасининг 2019 йилнинг ўтган давридаги фаолияти самарадорлиги муҳокама қилинди. 

Таъкидланганидек, мазкур тузилма зиммасига жорий йилда бажарилиши лозим бўлган 19 та вазифа юклатилган. Январь-сентябрь ойларида белгиланган 10 та вазифадан қўмита томонидан 4 та мақсадли вазифа бажарилмаганлиги аниқланди.

Жумладан, давлат хизматларини кўрсатишда ахборот ресурсларни, 1949-2019 йиллар давридаги архив фондини рақамлаштириш бўйича тайёргарлик ишларини амалга ошириш, жумладан, архив фондини рақамлаштириш методологиясини ишлаб чиқиш топшириғи берилган. “Давергеодезкадастр” қўмитаси томонидан амалга оширилган “Кўчмас мулкни рўйхатга олиш ва кадастр тизимини модернизация қилиш” лойиҳаси доирасида хорижий консалтинг корхоналари томонидан ишлаб чиқилган қўлланма сифатсиз, тушунарсиз бўлганлиги сабабли бу борадаги ишлар ҳанузгача якунланмаган. Шунингдек, архив маълумотларини рақамлаштиришни синов шаклида жорий қилиш учун юқори тезликда ва сифатли сканер қилиш имкониятига эга бор-йўғи 1 та қурилма харид қилинган.

Бундан ташқари, Давлат кадастрларини шакллантиришда ахборот-коммуникация технологияларини жорий этиш бўйича камида 15 та давлат кадастрини электрон шаклда шакллантириш ва уларни Интернет тармоғига жойлаштириш топшириғи берилган. Бу борадаги ишлар ҳам ҳанузгача якунланмаганлиги мажлисда қайд этиб ўтилди.

Санаб ўтилган бу ва бошқа камчиликларни бартараф этиш учун мутасадди ташкилотлар билан биргаликда чора кўриш таклиф этилди. Қолаверса Қорақалпоғистон Республикаси Вазирлар Кенгаши ва вилоят (шаҳар) ҳокимликлари билан биргаликда қишлоқ хўжалигига мўлжалланган захирадаги ерларини қайтадан хатловдан ўтказиб Геопорталга жойлаштириш ва йил якунига қадар захирадан чиқариш чораларини кўриш лозимлиги қайд этилди.

Мажлисда қўриб чиқилган масалалар бўйича Қўмитанинг тегишли қарори қабул қилинди.