Давлат илмий ташкилотлари ходимлари учун 48 кунлик меҳнат таътили берилади

Давлат илмий ташкилотларининг илмий фаолият юритувчи ходимларига 48 иш кунидан иборат йиллик ҳақ тўланадиган ҳамда моддий ёрдамни кўзда тутадиган меҳнат таътили бериш тартиби жорий қилинади. Бу «Илм-фан ва илмий фаолият тўғрисида»ги Қонунда кўрсатилган бўлиб, мазкур қонун Сенатнинг 23-ялпи мажлисида маъқулланди.

Ушбу қонун 7та боб, 48та моддадан иборат бўлиб, илмий фаолият юритувчи жисмоний шахсларнинг меҳнат ҳуқуқлари, мажбуриятлари, уларга бериладиган имтиёзларни белгилаб беради.

Илмий фаолият натижаларини тижоратлаштириш ҳамда илм-фан ва илмий фаолият соҳасини молиялаштириш масалалари батафсил кўрсатиб берилган. Хусусан, базавий молиялаштириш; илмий лойиҳаларни молиялаштириш; стажёр-тадқиқотчилик, таянч докторантура ва докторантурани молиялаштириш; ноёб илмий объектларни сақлашни молиялаштириш; илмий асбоб-ускуналардан жамоавий фойдаланиш марказларини молиялаштириш илм-фан ва илмий фаолият соҳасини молиялаштиришнинг йўналишларидир.

«Илм-фан ва илмий фаолият тўғрисида»ги Қонун асосида жисмоний ва юридик шахслар учун илмий фаолиятни қўллаб-қувватлаш жамғармаларини тузиш мумкинлиги ҳуқуқи берилмоқда.