Трамп Курдистон ишчи партиясини ИШИДдан “хавфлироқ ва кескинроқ” деб атади

Трамп Туркиянинг Суриядаги ҳарбий амалиётига изоҳ бериб, у ерда америкалик ҳарбийларни йўқотишни истамаётганини, бу Туркия ва Сурия ўртасидаги ихтилоф эканини айтган.

Фото: Reuters

АҚШ президенти Дональд Трамп Италия президенти Сержо Маттарелла билан Оқ уйдаги музокаралар натижалари бўйича ўтказилган матбуот анжуманда Курдистон ишчи партиясини (КИП) ИШИДдан ҳам “хавфлироқ ва кескинроқ” деб атади. “Мен айтгандим, у ерда фаришталар йўқ. КИПга қаранг, уни ИШИД ҳурмат қилади. Нима учун? Чунки улар яна ҳам кескинроқлар”, деб айтган Трамп.

“Курдлар бошқарадиган КИП террорчилик таҳдиди ва бошқа кўплаб жиҳатлардан, эҳтимол, ИШИДдан ёмонроқ”, деб қўшимча қилган АҚШ президенти.

Трамп Туркиянинг Суриядаги ҳарбий амалиётига изоҳ бериб, у ерда америкалик ҳарбийларни йўқотишни истамаётганини, бу Туркия ва Сурия ўртасидаги ихтилоф эканини айтган. “Сурия бизнинг дўст эмас, Асад бизнинг дўст эмас”, деб таъкидлаб ўтган Трамп ва Туркия президенти Ражаб Тоййиб Эрдўғанга Сурияга бостириб кириш учун “яшил чироқ” бермаганини айтган.

Трамп, шунингдек, Россиянинг Суриядаги ҳаракатларини собиқ иттифоқнинг Афғонистондаги ҳарбий амалиётига қиёслаган.

АҚШ президентининг фикрича, Сурия ва Россия ИШИДни АҚШдан ҳам ёмонроқ кўради ва террорчиларни йўқотишни ўзлари ҳам уддалай олади. “У давлат собиқ иттифоқ деб аталган, ҳозир эса Россия деб аталади, чунки Афғонистонда шунчалик кўп пул йўқотганки, жуда кичрайиб кетган”, деб айтган Трамп.

АҚШ курдларни Туркия қўшинларига курашида қўллаб-қувватлашдан бош тортиб, турк амалиёти ўтаётган ҳудудлардан ўз ҳарбийларини олиб чиқишга қарор қилди. Бунгача АҚШ томондан қўллаб-қувватлаб келинган курд отрядлари АҚШнинг бу қарорини “орқадан пичоқ санчиш” деб аташган.