Норвегияда 2020 йилдан икки фуқароликка рухсат берилади

Норвегияда 2020 йилдан бошлаб икки фуқароликка рухсат берилади. Норвегия телеграф бюроси (NTB) хабарига кўра, Норвегия фуқаролари бошқа давлат фуқаролигини олганида ўз мамлакати паспортидан воз кечишига тўғри келмайди, Норвегия фуқаролигини олган хорижликлар эса ўз мамлакати фуқаролигида ҳам қолишлари мумкин бўлади.

"Икки фуқароликка эга бўлишга рухсат бериш орқали биз Норвегия қонунлари глобал тенденцияларга мувофиқлашишига ҳаракат қилмоқдамиз", - деди таълим ва интеграция вазири Ян Туре Саннер.

Ўтган йили Норвегия парламенти фуқаролик тўғрисидаги қонунга тегишли ўзгартиришлар киритилишини маъқуллаганди. Ўзгартиришлар 2020 йил 1 январдан кучга киради.

Қайд этилишича, бошқа давлат фуқаролигини олганлиги учун Норвегия фуқаролигидан воз кечганлар қайтадан норвег паспортини олишлари мумкин бўлади.