Трамп «Ҳонгконгнинг 14 дақиқада янчиб ташланишига» йўл қўймаганини айтди  

АҚШ президенти Дональд Трамп Хитойнинг “миллионлаб аскарлари” норозилик намойишлари билан қамраб олинган Ҳонгконгга киришга тайёр тургани, бироқ у Хитой раиси Си Цзинпиндан буни қилмасликни илтимос қилгани учун улар жойидан жилмаётганини айтди. 

“Агар мен бўлмаганимда, Ҳонгконг 14 дақиқа ичида янчиб ташланарди. Унда [Си Цзинпин] Ҳонгконг остонасида турган миллион аскар бор эди. Улар мен қўнғироқ қилиб, “Илтимос, буни қилма. Сен катта хато қилмоқдасан, бу савдо келишувига катта таъсир кўрсатиши мумкин”, деганим учунгина жилмаяптилар”, деб айтган Трамп Fox News телеканали эфирида. 

Хитой ва АҚШ 16 ойдан бери “савдо уруши” ҳолатида қолмоқда. Икки давлат бир-бирларининг товарларига бир неча марта божлар ўрнатиб, уларни оширган.  

Ҳонгконгда экстрадиция ҳақидаги қонун лойиҳаси сабабли бошланган норозилик намойишлари июндан бери тўхтамаяпти. Ҳозиргача полиция намойишларда иштирок этган 4,5 минг кишини ушлаган, улардан энг кичиги 11 ёшда, 1,5 мингдан кўпроқ киши кўчаларда олинган жароҳатлар сабабли шифохонага тушган, 400 дан кўпроқ полициячи жабрланган.