НАТО Boeing билан 1 млрд долларлик шартнома имзолади

НАТО ва АҚШнинг Boeing компанияси AWACS радиолокацион излаш ва бошқариш самолётларини такомиллаштириш бўйича шартномани имзолади.

Йенс Столтенберг (ўнгда) ва Майкл Артур (чапда)/Фото: AP

Ҳужжатни имзолаш маросими НАТОнинг Бельгиядаги “Мелсбрук” ҳарбий базасида бўлиб ўтган. Шартномани НАТО бош котиби Йенс Столтенберг ва Boeing International президенти Майкл Артур имзолашган.

“AWACS – бу бизнинг [НАТОнинг] осмондаги кўзларимиздир, у ўнлаб йиллар давомида ҳаводаги амалиётларимизни қўллаб-қувватлаб келган”, деб айтган Столтенберг журналистларга.

Маълум қилинишича, НАТО қуролланишида AWACS туридаги 14 та самолёт мавжуд бўлиб, альянснинг улар иштирокидаги дастури 1982 йилдан бери амал қилади.

НАТО қуролланишда турган AWACS’ларни жорий модернизациялашдан кейин, жумладан самолётларга сунъий онгни ўрнатгач 2035 йилгача қўлламоқчи.