Сенаторлар «Давлат божи тўғрисида»ги қонунни маъқуллади

Ўзбекистон Республикаси Олий Мажлиси Сенати йигирма бешинчи ялпи мажлисида сенаторлар “Давлат божи тўғрисида”ги қонунни маъқуллади.

Қонун янги таҳрирдаги Солиқ кодекси билан бирга боғлиқ тарзда ишлаб чиқилган. Қонун давлат божини ундириш масалаларини белгилайдиган 38 та норматив-ҳуқуқий ҳужжатларни ўзида жамлаган бўлиб, тўғридан-тўғри таъсир кучига эга ҳисобланади. Қонун 5 та боб ва 27 та модда ва иловадан ташкил топган. У давлат божини бошқариш, тўлаш, қайтариш тартибини ҳамда давлат божининг миқдорлари назарда тутилган.

Мазкур қонуннинг муҳокамалари давомида сенатор Гулчеҳра Рихсиева адлия органлари томонидан давлат рўйхатидан ўтказилганлиги учун давлат божи базавий ҳисоблаш миқдорининг камайтирилганлигига тўхталди.

“Таъкидлашимиз керак, республика вилоятлараро нодавлат-нотижорат ташкилотларининг ставкаси 4 баравар бўлган бўлса, эндиликда 3 бараварга, фаолиятини вилоятда олиб борадиган нодавлат-нотижорат ташкилотларнинг ставкалари 2 баравардан 1 бараварга, туман, шаҳар, шаҳарча, қишлоқ ва овул ҳудудида олиб борадиган нодавлат-нотижорат ташкилотларнинг ставкалари 2 баравардан 50 фоизгача камайтирилмоқда”, - дея Гулчеҳра Рихсиеванинг сўзларини келтирмоқда Kun.uz мухбири.

Қонунни ишлаб чиқишда хорижий тажриба, жумладан Озарбойжон, Арманистон, Молдова, Тожикистон ва Грузия каби давлатларда давлат божи тўғрисида қонун ишлаб чиқилгани ва тасдиқлангани ўрганилгани айтилди.