«Арсенал» «Саутҳемптон» ҳимоячиси Седрик Соарешнинг трансферини эълон қилди.
28 ёшли португалиялик футболчи «тўпчилар» томонидан мавсум якунига қадар ижарага олинган. Ижара учун «авлиёлар»га 1 миллион фунт тўланади. Шунингдек, унинг 65 минг фунт стерлинг миқдоридаги ҳафталик маоши лондонликлар томонидан тўлаб борилади.
2020 йил ёзида «Саутҳемптон» билан шартномаси муддати якунланадиган футболчи эркин агент сифатида Лондон клубига келади.
«Саутҳемптон» шартномаси муддати тугашига ярим йил қолган футболчисини 6 млн фунтга сотишни режалаштираётганди.
Соареш – 2016 йили Португалия терма жамоаси билан Европа чемпиони бўлганди. У 2010-2015 йилларда «Спортинг» клуби аъзоси бўлган, 2015 йилдан буён «Саутҳемптон» сафида тўп суриб келаётганди (2018-19 йилги мавсумнинг иккинчи қисмини «Интер»да ижара асосида ўтказган).
Бундан аввалроқ «Арсенал» «Фламенго»нинг испаниялик ҳимоячиси Пабло Марини кейинроқ сотиб олиш ҳуқуқи билан ижарага олганди.
