Қурилиш материаллари кодланади. Параллел лойиҳалашга рухсат берилмайди

Ҳар бир қурилиш материалининг ўз рақами ва стандарти бўлади. Очиқ электрон базага уларнинг тендер кодлари ва нархлари ҳам киритилади. Бундан ташқари, қурилишни параллел лойиҳалаш билан биргаликда олиб бориш амалиётига чек қўйилади.

Қурилиш соҳасига ахборот-коммуникация технологияларини жорий қилиш натижасида қурилишни бошлаш учун рухсатнома олиш муддати 1 соатни ташкил этмоқда. Шу билан бирга, қурилишда ишлатиладиган ҳар бир маҳсулот махсус кодланган ҳолда тендер нархлари электрон базага жойланади. Қурилиш вазирлиги матбуот анжуманида шу ҳақда маълум қилинди.

«Ўзбекистон қурилиш индустриясидаги энг асосий кўрсаткичлардан яна бири – бу қурилиш материалларидир. Биз “Ўзсаноатқурилишматериаллари” уюшмаси билан биргаликда барча қурилиш материалларини рақамлашни келишиб олдик. Яъни, ҳар бир қурилиш материалининг ўз рақами ва стандарти бўлади. Бу маълумотлар очиқ базада жойлаштирилади. Айни вақтда шунинг устида ишлар бошлаб юборилган.

Материаллар стандартлари, қандай сақланиши, уларнинг тендер кодлари ва энг асосийси, уларнинг нархлари ҳам киритиб қўйилади. Ҳар бир лойиҳачининг смета ҳужжатларини ишлаб чиқишида қўл келади», - деди Қурилиш вазири биринчи ўринбосари Шерзод Ҳидоятов.

Эндиликда, қурилиш ишларини бошлаш учун рухсатнома олиш талаб этилмайди. Аксинча, назорат инспекциясини қурилиш бошланишидан хабардор қилиш кифоя. Шу муносабат билан рухсатномани олиш учун талаб этиладиган 15 кунлик муддат 1 соатгача қисқаришига эришилмоқда.

«Илгарилари қурилишни бошлаш учун назорат инспекциясининг рухсатномаси бериларди. Бунга 15 кун берилганди. Бугунги кунда рухсатнома бекор қилинди. Назорат инспекцияси ходимига бир соат вақт берилади қурилиш майдони билан танишишга, тадбиркорми, пудратчи ёки буюртмачими қурилишни бошлаётганидан инспекцияни хабардор қилиб, ишни бошлайверади. Рухсатнома олиши талаб этилмайди. 15 кунлик муддат 1 соатга қисқарди. Бу МДҲ ва бошқа ривожланган мамлакатларда қўлланилиб келинаётган амалиёт», - дея масалага ойдинлик киритди Тошкент шаҳар қурилиш соҳасидаги ҳудудий назорат инспекцияси бош инспектори Алижон Соатов.

Тадбирда, шунингдек, қурилишни параллел лойиҳалаш билан бирга олиб бориш амалиётига чек қўйилгани билдирилди. Унга, истисно тариқасида, фақат президент рухсати билан йўл қўйилади.

«Параллел лойиҳаларга 100 фоиз тўсиқ қўйилди. Ҳеч қандай параллел лойиҳага рухсат йўқ. Фақатгина, Миллий лойиҳалаш агентлиги орқали мавжуд лойиҳаларни бериш ҳам Қурилиш вазирлигига ўтказиляпти. Булар APC шартномалардир. Уларнинг ўз тамойиллари, талаблари ишлаб чиқилади. Шу билан бирга, истисно тариқасида, фақатгина давлат раҳбарининг рухсати билангина APC шартномалар тузилиши мумкин бўлади. Лекин президент топшириқлари бўйича параллел лойиҳалаш амалиёти, тушунчаси 100 фоиз йўқ бўлади. Ҳар бир қурилиш 100 лойиҳалаштирилади, экспертизадан ўтказилади ва қурилиб топширилади», - деди Қурилиш вазирининг биринчи ўринбосари.