Трамп савдо-сотиқда «миллий хавфсизлик»ни баҳона қилмасликка чақирди

Аввалроқ Wall Street Journal ўз манбаларига таяниб АҚШ президенти маъмурияти Хитойга LEAP 1C авиадвигателларини етказиб беришни тўхтатиш масаласини кўриб чиқаётгани тўғрисида хабар берганди.

Фото: Reuters

АҚШ президенти Дональд Трамп Хитойга авиадвигателлар ва бошқа маҳсулотларни сотмоқчи эканлигини билдирди ва бошқа давлатлар билан савдо-сотиқда «миллий хавфсизлик тўғрисидаги баҳона»ни ишлатмасликка чақирди.

Аввалроқ Wall Street Journal ўз манбаларига таяниб АҚШ президенти маъмурияти Хитойнинг Comac C919 лайнерлари учун Американинг General Electric ва Франциянинг Safran компаниялари томонидан ишлаб чиқарилган LEAP 1C авиадвигателларини етказиб беришни тўхтатиш масаласини кўриб чиқаётгани тўғрисида хабар берганди.

Трамп Қўшма Штатлар "доим ишлатиладиган миллий хавфсизлик тўғрисидаги баҳона билан" бошқа давлатлар учун Америка маҳсулотларига эга бўлишни қийинлаштира олмаслигини айтди.

"Биз Хитой ва бошқа давлатларга ўз маҳсулотларимизни сотишни истаймиз", - деб ёзди Трамп Twitter саҳифасида.

"Биз билан бизнес юритиш имконсиз бўлиб қолишини истамаймиз. Бу буюртмаларни бошқа кимдир олишинигина англатади. Масалан, мен Хитой бизнинг дунёдаги энг яхши авиадвигателларимизни сотиб олишини хоҳлайман", - деб қайд этди АҚШ президенти.