Россия президенти Владимир Путин Иваново шаҳрига ташрифи вақтида жамоатчилик билан учрашув ўтказди. Путин учрашувда ҳокимият тепасида қолиш учун турли “схема”лардан фойдаланишни истамаётганини айтган.
Путиннинг таъкидлашича, унга ўз иши ёқади, бироқ у бу иш учун “мамлакат учун номақбул ёки уни барбод қилувчи бирор схемани амалга оширмайди”.
Россия раҳбари мамлакатда бошқарув шакли ўзгариши ҳақидаги саволга кучли президент ҳокимиятидан воз кечиш барқарор сиёсий партиялар йўқлиги ҳисобига Россия учун салбий таъсир кўрсатиши мумкинлигини айтган. “Барчаси ёмон бўлади”, деб айтган Путин. У бунга мисол тариқасида сиёсий партиялар борлигига қарамасдан парламент тизимида муаммолар бошланган Европани келтирган. “Бизда эса қандай мураккаб давлат! Биз учун бу ҳалокатлидир”, деб тушунтирган Путин.
Россия президентининг айтишича, президент бўлиш – бу иш эмас, балки қисматдир. Путин унинг иши олиб бораётган мулоқотларидан ҳам иборатлигини айтган. “Ахир бундан чарчаш мумкинми? Фақатгина завқ”, деб таъкидлаб ўтган Россия президенти. Путиннинг таъкидлашича, гап у “чарчаб, четга ўтмоқчилиги”да ҳам эмас. Унинг айтишича, унинг ўрнида бўлган исталган одам Россия президенти лавозимини қисмат деб қабул қилган бўларди.
Россия президенти суҳбат давомида ишонч ва қўллаб-қувватлов учун одамларга чексиз миннатдорлик билдирган. Унинг айтишича, қўллаб-қувватловсиз, айниқса 2000-йиллар бошида, “умуман ишлашнинг имкони йўқ”.
