Польшада президентлик сайловлари кечиктирилиши мумкин

Польша ҳукумати коронавирус инфекциясининг тарқалиши сабабли май ойида бўлиб ўтадиган президентлик сайловлари кейинга сурилиши мумкин. Бу ҳақда Reuters хабар тарқатган.

“Сайловга ҳали икки ой бор. Кўрамиз. Бу каби масалалар яқин кунларда ўз ечимини топади. Касалликнинг тарқалиб боришига қараб кейинги қарорларни қабул қиламиз. Ҳозирги кунда бизда бундай қарор мавжуд эмас ва бу бекор қилинмайди, дегани ҳам эмас”, – дейди Польша ички ишлар вазирининг ўринбосари Павел Шефернакер RMF FM радиосига берган интервьюсида. 

“Бугун сайлов ҳақида ҳеч ким ўйлаётгани йўқ, ҳозир ҳамма касалликдан қандай қутулиш ҳақида ўйламоқда”, дея қўшимча қилган у.

Aйни вақтга келиб, Польшада коронавирус билан боғлиқ 84та ҳолат аниқланган бўлиб, икки киши вафот этган. 

Жума куни ҳукумат Европадаги кўплаб мамлакатлар қатори чет эл давлатлари билан ўз чегараларини ёпишини маълум қилган эди.