АҚШда сланец нефти қазиб олувчи биринчи йирик компания касодга учради

АҚШнинг бир неча йил аввал сланец нефти бозорида етакчилардан бири бўлган Whiting Petroleum компанияси банкротликдан ҳимоялаш ҳақида ариза топширди. Компания жорий ҳафтада 262 млн доллар қарзини тўлай олмаган.

Фото: AP

Компаниянинг умумий қарзи эса 2,2 млрд долларга етган. Натижада компания эгалари компания устидан назоратни тўлиқ йўқотиш ҳисобига қарзни ҳисобдан чиқаришни сўрашга қарор қилишган.

Bloomberg ахборот агентлигининг таъкидлашича, Whiting Petroleum’да муаммолар коронавирус пандемиясигача бошланган. 5 йил аввал у Шимолий Дакота штатида нефть майдонларини ўзлаштириш бўйича етакчилардан бири бўлган, бироқ кейинроқ унинг молиявий ҳолати секин-аста ёмонлашиб борган.

Нефть нархларининг қулаши билан кечаётган пандемия компаниянинг қарз юкламасини тезлаштириб юбориб, уни касодга учрашга олиб келган. Компанияда нефть нархи 50 доллар атрофида сақланиб қолса, фаолиятларини давом эттира олишларига умид қилинган, бироқ нефть нархининг 20 долларга тушиб кетиши буни имконсизга айлантиради.

Таҳлилчиларнинг таъкидлашича, Whiting’нинг касодга учраши ягона ҳолат бўлмайди. Mizuho Securities USA таҳлилчиларининг баҳолашича, сланец нефти олувчи 6 минг компаниядан 70 фоизи пандемия ҳамда Россия ва Саудия Арабистони ўртасидаги нефть нархи учун “уруш” сабабли ўз фаолиятини тугатиши мумкин.

1 апрелда Россия президенти Владимир Путин АҚШда нефть нархининг пастлигидан унинг нархи 40 доллар атрофида сақлансагина, сланец нефти қазиб олиш рентабел бўлиши сабабли хавотирлана бошлашганини айтган. “АҚШ иқтисодиёти учун бу оғир синовдир”, деб таъкидлаб ўтган Путин.

Тайёрлаган Шуҳрат Раҳимов

#АҚШ #сланец нефти #пандемия

2019 йилнинг декабрь ойи охирида Хитойнинг Ухань шаҳрида номаълум вирус тарқала бошлади. Бу вирус ҳаво орқали одамдан одамга юқади ва ўлимга олиб келади.