Польшада маҳбуслар тиббий ниқоблар тикишни бошлади

Ҳозирда Польшада эпидемия режими жорий этилган. Охирги маълумотларга кўра, 2554 кишида коронавирус аниқланган, улардан 43 нафари вафот этган.

Фото: Getty Images

Польшада маҳбуслар тиббий ниқоблар тикиш ва дезинфекцияловчи суюқликлар ишлаб чиқаришни бошлади. Бу ҳақда мамлакат адлия вазирининг ўринбосари Михал Вуйчик маълум қилди.

"24та жазони ижро этиш муассасасида ниқоблар тикиш бошланди", - деди Вуйчик.

Унинг маълумот беришича, маҳбуслар ойига 800 минг донага яқин ниқоб тикади. Бундан ташқари, жазони ижро этиш тизимидаги корхоналардан бирида ҳоспиталлар учун махсус комбинезонлар ишлаб чиқарилмоқда, деди у.

Маҳбуслар шунингдек, махсус дезинфекцияловчи суюқликлар ишлаб чиқаришга ҳам киришади.

"Яна бир жазони ижро этиш муассасасида махсус дезинфекция воситалари ишлаб чиқариш линиясини ташкил этамиз. Ойига 80 минг литрга яқин суюқлик тайёрланади", - деди вазир ўринбосари.

Тайёрлаган Дилшод Аскаров

#Польша #тиббий ниқоб #коронавирус

2019 йилнинг декабрь ойи охирида Хитойнинг Ухань шаҳрида номаълум вирус тарқала бошлади. Бу вирус ҳаво орқали одамдан одамга юқади ва ўлимга олиб келади.