Испанияда келаси ойнинг иккинчи ярмидан карантин чоралари юмшатилади

Испания ҳозирда коронавирус қурбонлари бўйича дунёда учинчи ўринда (АҚШ ва Италиядан кейин) ва касалликка чалинганлар сони бўйича иккинчи ўринда (АҚШдан кейин) турибди.

Фото: AFP

Испанияда май ойининг иккинчи ярмидан карантин чоралари босқичма-босқич юмшатилади. Бу ҳақда мамлакат бош вазири Педро Санчес маълум қилди.

"Май ойининг иккинчи ярмида COVID-19 эпидемиясига қарши курашнинг иккинчи босқичини бошлаймиз. Қоида ва чекловлар янги сценарийларга мос равишда ўзгариши керак. Хавф пасайиши билан юқори даражадаги тайёргарлик режими ҳам ўзгаради", - деди Санчес.

Санчес ҳукумат 14 ёшгача бўлган болаларнинг кўчага чиқишига рухсат берувчи ҳужжатни қабул қилишини, аммо бу "умумий карантин қоидаларига таъсир кўрсатмаслигини" айтди.

Чоршанба куни конгресс депутатлари ҳукуматнинг юқори даражадаги тайёргарлик режимини 9 майгача узайтириш тўғрисидаги таклифи бўйича овоз беради.

Испания ҳозирда коронавирус қурбонлари бўйича дунёда учинчи ўринда (АҚШ ва Италиядан кейин) ва касалликка чалинганлар сони бўйича иккинчи ўринда (АҚШдан кейин) турибди. Эпидемия бошланганидан буён мамлакатда касаллик юқтирганлар сони 208 мингдан ошиб кетди, 22 мингга яқин киши вафот этди.

Тайёрлаган Дилшод Аскаров

#Испания #коронавирус

2019 йилнинг декабрь ойи охирида Хитойнинг Ухань шаҳрида номаълум вирус тарқала бошлади. Бу вирус ҳаво орқали одамдан одамга юқади ва ўлимга олиб келади.