Ўзбекистонда мактабгача таълимнинг давлат стандарти тасдиқланади

Вазирлар Маҳкамасининг “Мактабгача таълим ва тарбиянинг давлат стандартини тасдиқлаш ҳақида”ги қарори лойиҳаси эълон қилинди.

Давлат стандартининг мақсади – мактабгача таълим тизимини мамлакатда амалга оширилаётган ислоҳотлар, хорижий мамлакатларнинг илғор тажрибалари ва замонавий ахборот-коммуникация технологияларига асосланган ҳолда ташкил этиш, болаларни соғлом ва ҳар томонлама етук вояга етказиш, таълим-тарбия жараёнига самарали таълим ва тарбия шакллари ҳамда усулларини жорий этиш ҳамда маънавий баркамол авлодни тарбиялашдан иборат.

Давлат стандартининг вазифалари қуйидагилардан иборат:

Мактабгача таълимнинг мазмуни ва сифатига қўйиладиган талабларни белгилаш;

миллий, умуминсоний ва маънавий қадриятлар асосида тарбиялашнинг самарали шакллари ва усулларини жорий этиш;

ўқув-тарбия жараёнига инновацион педагогик ва замонавий ахборот-коммуникация технологияларини жорий этиш;

таълим-тарбия фаолияти сифатини назорат қилишнинг ҳуқуқий асосларини такомиллаштириш;

мактабгача таълим ташкилотларида тўлақонли ва хавфсиз овқатлантиришни ташкил этишга бўлган гигиеник талабларни белгилаш;

мактабгача таълим ташкилотларини идоравий қурилиш меъёрларини тартибга солиш;

мактабгача таълим ташкилотларини ўйинлар, ўйинчоқлар, мебель, жиҳозлар ва бошқа техник, реабилитацион воситалар билан жиҳозлаш;

мактабгача таълим ташкилотларида ёнғин хавфсизлигини таъминлашга қўйиладиган талабларга мувофиқлигини таъминлаш.

Давлат стандарти қуйидаги асосий принципларга асосланади:

тарбияланувчининг интилишлари, қобилияти ва қизиқишлари устуворлиги;

ҳар бир боланинг, шу жумладан жисмоний ёки психик ривожланишида нуқсони бўлган боланинг мактабгача таълим ва тарбия олишга бўлган ҳуқуқини амалга ошириш ва имкониятининг тенглиги;

давлат стандартининг таълим соҳасидаги давлат ва жамият талабларига мослиги;

мактабгача таълимнинг бошқа таълим турлари ва босқичлари билан узлуксизлиги ва таълим мазмунининг узвийлиги;

мактабгача таълим мазмунининг республикадаги барча ҳудудларда бирлиги ва яхлитлиги;

мактабгача таълимнинг мазмуни, шакли, воситалари ва усулларини танлашда инновация технологияларига асосланилганлиги;

хорижий мамлакатларнинг таълим соҳасида меъёрларни белгилаш тажрибасидан миллий хусусиятларни ҳисобга олган ҳолда фойдаланиш.