Венесуэлада қўлга олинган америкаликларга терроризм айблови қўйилади 

Венесуэлага ноқонуний равишда киришга уринган чоғида қўлга олинган АҚШ фуқаролари бошқа гумондорлар сингари терроризм иши бўйича айбланувчига айланади. Бу ҳақда Венесуэла бош прокурори Тарек Вильям Сааб маълум қилди.

"АҚШнинг қўлга олинган фуқароларига терроризм, фитна, ноқонуний қурол контрабандаси ва жиноий уюшма тузиш айбловлари қўйилади", - деди Сааб. 

Унинг сўзлари Венесуэла бош прокуратурасининг расмий Twitter саҳифасида келтирилмоқда.

Саабнинг сўзларига кўра, мамлакатга ноқонуний киришга уринишда иштирок этган Венесуэла фуқаролари эса суд олдида терроризм, хорижий ҳукумат фитнасида қатнашиш, ватанга хиёнат, қурол контрабандаси, терроризмни молиялаштириш ва жиноий уюшма тузиш айбловлари бўйича жавоб беради.

Венесуэла ички ишлар вазири Нестор Ревероль 3 май куни денгиз томондан колумбиялик жангарилар ҳужуми қайтарилганини маълум қилганди. Маълумотларга кўра, жангарилар Венесуэлага тезюрар катерларда бостириб кирмоқчи бўлган. Кейинроқ ҳужумни қайтариш вақтида 8 киши қўлга олингани, 2 киши йўқ қилингани маълум қилинган. 

Венесуэла президенти Николас Мадуронинг маълум қилишича, ҳужум иштирокчилари орасида икки америкалик - АҚШ президенти шахсий қўриқлаш хизмати ходимлари бўлган.

Мадуро давлат телевидениеси эфири орқали уларнинг Люк Александр Денман ва Айран Берри номларига расмийлаштирилган ҳужжатларини намойиш этган. 

“Биз Венесуэлага етиб бориб, Каракасга тушишимиз ва аэропортни босиб олишимиз керак эди. Биз олган кўрсатмалар президент Мадурони самолётга хавфсиз ўтказишни таъминлаш учун аэропортни босиб олишни ўз ичига олган”, деб айтган Денман сўроқ чоғида.