2020 йилда Бухоро, Жиззах, Қашқадарё, Самарқанд ва Фарғона вилоятларида Президент мактабларини ташкил этиш режалаштирилган эди. Президент, ижод ва ихтисослаштирилган мактабларни ривожлантириш агентлигининг хабар беришича, ушбу мактабларнинг қурилиши тўхтаб қолгани йўқ.
«Жиззах шаҳри марказидаги Олимпия захиралари спорт коллежи ёнида, Самарқанд шаҳрининг Амир Темур, Қарши шаҳрининг Мустақиллик (Алишер Навоий номли истироҳат боғига туташ ҳудудда), Фарғона шаҳрининг Қашқар, Бухоро шаҳрининг Навоий кўчаларида президент мактабларининг қурилиши давом этмоқда.
Янги қурилаётган Президент мактабларининг барчаси замонавий услубда, миллий ва жаҳон меъморчилигининг энг сўнгги ютуқлари асосида бунёд этилмоқда. Бошқа Президент мактабларида бўлгани каби янги қурилаётган таълим муассасаларининг ўқув бинолари 168 ўринга мўлжалланган.
Бу ерда ётоқхона, стадион, бассейн, ёпиқ ва очиқ спорт заллари, кутубхона, болалар дам олиш жойлари, чет элдан келадиган ўқитувчилар учун алоҳида меҳмонхона, автотураргоҳ, ота-оналар учун кутиш жойи ва фаоллар зали яратилади. Айни пайтда юртимизда карантин қоидалари амал қилаётган бўлса-да қурувчилар белгиланган санитария ва гигиена талабларига риоя қилган ҳолда мактабнинг қурилиш ишларини олиб бормоқда», дея агентлик директорининг матбуот котиби Анвар Умаровнинг сўзларини келтирмоқда Kun.uz мухбири.
Қайд этилишича, Президент, ижод ва ихтисослаштирилган мактабларни ривожлантириш агентлиги Президент мактабларини ўқув йилига тайёрлаш бўйича ишларни давом эттиради.
Аввалроқ пандемия сабабли жорий йилда қуриб битказиладиган ҳамда амалда фаолият кўрсатаётган Президент мактабларига ўқувчилар қабули кейинги йилга қолдирилгани маълум қилинган эди.
Президент, ижод ва ихтисослаштирилган мактабларни ривожлантириш агентлиги директори Сарвар Бобохўжаев Kun.uz мухбири билан суҳбатда имтиҳонларда шаффофликни таъминлаш, синовларни адолатли ўтказа олиш борасида қатор саволлар бўлгани сабабли Президент мактаблари имтиҳонларини онлайн шаклда ўтказиш лозим деб топилмаганини айтган эди.
Шунингдек, Сарвар Бобохўжаев 2020 йилги қабулнинг қолдирилиши мактабларнинг қурилиш муддатларига таъсир қилмаслиги, бешта вилоятда Президент мактаблари қурилишини тегишли ташкилотлар, жумладан, агентлик назорат қилиб бораётганини таъкидлаганди.
Мавзуга доир:
