Ўзбекистонда қишлоқ хўжалиги экинлари учун генетик банк яратилади

Қишлоқ хўжалиги вазирлиги матбуот хизмати хабарига кўра, 15 июль куни Қишлоқ хўжалиги вазири Жамшид Ходжаев бошчилигидаги Республика ишчи гуруҳи Ўсимликлар генетик ресурслари илмий-тадқиқот институти ҳамда Қишлоқ хўжалиги экинлари навларини синаш марказига ташриф буюрган.

Ишчи гуруҳи томонидан олиб борилган таҳлилларга кўра, Республикада озиқ-овқат хавфсизлигини барқарор таъминлаш, келгусида генетик ресурсларимизни сақлаб қолиш мақсадида соҳа мутахассислари томонидан қишлоқ хўжалиги экинларининг маҳаллий навларини кенгроқ ўрганиш ҳамда муҳофаза этиш чораларини кучайтириш талаб этилади. Бу борада Ўзбекистоннинг халқаро дастурларда фаол иштирокини таъминлаш ва соҳага халқаро етук мутахассисларни жалб этиш эҳтиёжи юқори. Шу боис БМТ томонидан илгари сурилган озиқ-овқат ва қишлоқ хўжалиги соҳасидаги генетик ресурсларни муҳофаза қилиш бўйича халқаро битимни ратификация қилиш чораларини кўриш талаб этилади. 

Ишчи гуруҳи аъзолари институт илмий ходимлари, олимлари билан учрашиб, бу ерда олиб борилаётган ишларни ўрганишди. Соҳада илмий-тадқиқот ишлари кўламини кенгайтириш, янги экспортбоп навларни яратиш, узум навларининг генофондини сақлаш ва бойитиш, хорижий нуфузли илмий муассасалар билан ўзаро ҳамкорликни кучайтириш, илмий салоҳиятни янада ошириш каби масалалар юзасидан ўзаро фикр алмашишди.

Ўсимликлар генетик ресурслари илмий-тадқиқот институти 1924 йилда ташкил этилган бўлиб, Марказий Осиёда қишлоқ хўжалик экинларининг йирик дунёвий коллекциялари сақланаётган ягона илмий ташкилот ҳисобланади. Ҳозирги пайтда бу ерда табиатда йўқолиб бораётган, ноёб қишлоқ хўжалик экинларининг турлари, турли давлатлар селекциясига оид замонавий навлар ва қадимий маҳаллий ҳамда уларнинг ёввойи авлодларининг 100 хил қишлоқ хўжалиги экинларининг 43 мингдан ортиқ намуналари сақланмоқда.