Фарғонадан Сўхга авиақатновларни йўлга қўйиш учун ишлар бошланди

«2020-2021 йилларда Фарғона вилоятининг Сўх туманини комплекс ижтимоий-иқтисодий ривожлантириш чора-тадбирлари тўғрисида»ги президент қарори билан Фарғона вилояти ҳокимлигига бир ой муддатда Сўх туманида самолёт ва вертолётлар учун учиш-қўниш майдончаларини ташкил этиш вазифаси юклатилган эди.

Вилоятнинг эксклав ҳудуди бўлган Сўх туманига авиқатновлар йўлга қўйиш бўйича Фарғона халқаро аэропортида дастлабки харакатлар бошланб юборилган, деб хабар бермоқда Kun.uz мухбири.

Маълум қилинишича, авиақатновларга Ўзбекистондаги «Humo AIR» авиакомпаниясининг Ан-2 самолёти ҳамда Ўзбекистон ҳаво йўлларининг «Uzbekistan Helicopters» МЖЧга қарашли МИ-8 вертолётлари жалб қилинмоқда.

Фарғона халқаро аэропортидан олинган маълумотларга кўра, Ан-2 самолёти 12та йўловчи сиғимига, МИ-8 вертолёти эса 16 нафардан 20 нафаргача одам олиш имкониятига эга ҳисобланади. Йўловчилар 35-40 дақиқада Фарғонадан Сўхга ёки Сўхдан Фарғонага етиб олиш имкониятига эга бўлади. Парвозларни ҳозирча кунига 2тадан амалга ошириш мўлжалланмоқда. Келгусида бу рақам талабга қараб яна кўтарилиши мумкин.

Айни кунларда республика Транспорт вазирлиги авиақатновларнинг чипта нархлари устида ўрганишлар олиб бормоқда. Чипталар ҳам йўловчилар учун мақбул нархларда бўлиши таъкидланмоқда. Агар чипта нархлари ошиб кетишига етарли сабаблар бўлса, унда давлат томонидан субсидия берилиб, бу ҳолатларнинг олдини олиш чоралари кўрилмоқда. Қолаверса, кўп болали, ногиронлиги бор, кам таъминланган ҳамда қариялар учун махсус чегирмалар ҳам йўлга қўйилиши режалаштирилмоқда.

Айни кунларда Фарғона Халқаро аэропортининг кириш қисмига махсус чиптахоналар қурилмоқда.