Ўтган ҳафта Қибрай туманида саёҳат жомадонида жойланган эркак кишининг мурдаси топилган эди. Бош прокуратура мазкур жиноят иши юзасидан икки киши қўлга олинганини хабар қилди.
«Тергов давомида 2 нафар шахсга нисбатан Жиноят кодексининг 97, 169, 227 ва 241-моддалари билан айб эълон қилиниб, уларга «қамоққа олиш» тарзидаги эҳтиёт чораси қўлланилган.
Тергов ҳаракатлари давом этмоқда», – дейилади маҳкама матбуот котиби Ҳаёт Шамсутдинов берган ахборотда.
Маълумот учун, ЖКнинг 97-моддаси – қасддан одам ўлдириш; 169-модда – ўғрилик; 227-модда – ҳужжатлар, штамплар, муҳрлар, бланкаларни, автомототранспорт воситаларининг ва улар тиркамаларининг (ярим тиркамаларининг) давлат рақам белгиларини эгаллаш, нобуд қилиш, уларга шикаст етказиш ёки уларни яшириш; 241-модда – жиноят ҳақида хабар бермаслик ёки уни яширишни назарда тутади.
Аввалроқ берилган хабарга кўра, Ш.А.нинг жасади 8 август куни кечга яқин Қибрай туманидаги ГЭС ҳудудидан, саёҳат чемоданига тиқиб қўйилган ҳолда топилган.
52 ёшда бўлган эркак муқаддам Ўзбекистон Республикаси Олий судида таъминотчи вазифасида ишлагани ҳақида маълумотлар бор. Шунингдек, у Самарқанд вилоятида туғилгани, пойтахтнинг Яккасарой туманида яшаб келгани маълум.
Мурдани кўздан кечириш давомида баданида тан жароҳати ва ундан қолган излар аниқланмаган, суд тиббий экспертиза бўлинмаси у бўйнидан тўмтоқ жисм билан бўғилиши оқибатида нафас етишмаслигидан вафот этган, деган бирламчи хулосани берган.
Шимининг чўнтагидан жами 410 000 сўм миқдорда нақд пул топилган.
10 августда берилган дастлабки ахборотда, Ш.А. 7 август куни эрталаб уйидан «Gentra» автомобилида Тошкент шаҳридаги Республика шошилинч тез тиббий клиник (собиқ 6-сонли) шифохонасига чиқиб кетгани, ушбу машина қидирилаётгани айтилган эди.
