Цементнинг биржадаги нархи пасаймоқда

Хусусан, жорий йилнинг 17 августдан 23 августгача бўлган даврда ўтказилган биржа савдо натижаларига кўра барча маркали цементнинг ўртача нархларида ҳар куни бир маромда пасайиш кузатилиб, ҳафта давомида биржа савдоларига 215 025,0 тонна цемент қўйилди ва улардан 210 751,0 тоннаси, яъни 98,0% сотилди. Ўртача кунлик сотув ҳажмлари 42,1 минг тоннани ташкил қилди.

Кўриб чиқилаётган даврда цементнинг барча маркалари бўйича шаклланган кунлик ўртача нархлар маҳсулотнинг бир тоннаси учун 789,4 минг сўмдан 736,6 минг сўмгача, яъни 6,7% га пасайди. Эътиборлиси, куни кеча ўтказилган биржа савдоларида эса цемент нархи 679,4 минг сўмгача тушди. Биржа савдоларига ҳар куни ўртача 43,2 минг тонна цемент маҳсулотлари қўйилган ҳамда биржадаги нархлар фақатгина ҳақиқий бозор тамойиллари асосида талаб ва таклифга кўра шаклланган. Сўнгги икки ҳафта мобайнида ўтказилган биржа савдолари цемент бозорида талаб ва таклиф мутаносиблиги таъминланганлигини кўрсатмоқда. Хусусан, 17 августдан 27 августгача бўлган даврда цементнинг ўртача нархи маҳсулотнинг бир тоннаси учун 789,4 минг сўмдан 679,4 минг сўмгача, яъни 14 фоизга тушган.

Савдо иштирокчиларининг фикрига кўра, цемент нархларининг пасайишига биржа савдоларига сотувчилар томонидан қўйилаётган цемент ҳажмларининг ўсиши ҳамда цемент импорти тартибини соддалаштирилганлиги ўз кўмагини берган. Бундан ташқари, ўтган ойларда “Ўзсаноатқурилишматериаллари” уюшмаси масъуллигида Жиззах вилоятида йиллик қуввати 1,2 млн тонна бўлган "Huaxin Cement Jizzakh" МЧЖ ҚК, Тошкент вилоятининг Янгийўл туманида “Қувасойцемент” АЖга қарашли 1 млн тонна қувватга эга тегирмоннинг фойдаланишга топширилганлиги биржадаги цемент нархининг пасайишига ёрдам берди.

Маълумот учун, жорий йилнинг IV-чорагида Тошкент вилоятининг Оҳангарон туманида “Оҳангаронцемент” АЖда йиллик қуввати 2,4 млн тонна бўлган янги цемент заводи ишга тушурилади. Натижада мамлакатимизда цемент ишлаб чиқариш ҳажми оширилади, маҳаллий қурилиш материаллари бозори сифатли маҳсулот билан таъминланади.

“Ўзсаноатқурилишматериаллари” уюшмаси
Матбуот хизмати