Moderna акциялари вакцина ҳақидаги янгиликлардан кейин 17,5 фоизга қимматлади

АҚШнинг коронавирусга қарши вакцина ишлаб чиқаётган Moderna фармацевтик компанияси акциялари нархи охирги биржа савдолари давомида 24,06 долларга (17,5 фоизга) қимматлаб, 151,08 долларга етди. 

Moderna акциялари нархининг бундай кескин ўсиши компания ўзи ишлаб чиққан вакцинани қўллаш учун маъқуллашга АҚШнинг озиқ-овқат маҳсулотлари ва дори-дармонлар сифати бўйича санитар назорат бошқармаси ва Европа тиббиёт агентлигига ариза бермоқчилигини эълон қилгандан кейин юз берган.

Аввалроқ компания вакцина коронавирус инфекцияси оғир кечишининг 100 фоиз олдини олишини маълум қилганди.

Moderna’дан ташқари, АҚШда вакцинани ишлаб чиқиш билан Johnson & Johnson, Merck ва Pfizer компаниялари ҳам шуғулланмоқда. АҚШ ҳукумати вакциналар ишлаб чиқилишига 12 млрд доллар инвестиция қилган.

Ўтган ҳафта Еврокомиссия Moderna билан 80 млн доза вакцина сотиб олиш бўйича шартнома тузган. Агар вакцина самарадорлиги ва хавфсиз экани исботланса, Еврокомиссия ундан яна 60 млн доза сотиб олади. Moderna вакцинаси нархи 25 доллардан 37 долларгача бўлиши мумкин.