ЕИ Венесуэладаги парламент сайловларини тан олмаслигини билдирди

ЕИнинг ташқи ишлар ва хавфсизлик сиёсати бўйича олий вакили Жозеп Боррелнинг сўзларига кўра, сайлов минимал халқаро стандартларга мувофиқ ўтмаган. У овоз бериш натижаларини «сиёсий плюрализмга нисбатан ҳурматсизлик» деб атади.

Фото: Reuters

Евроиттифоқ Венесуэла миллий ассамблеясига бўлиб ўтган сайлов натижаларини тан олмайди. Бу ҳақда ЕИнинг ташқи ишлар ва хавфсизлик сиёсати бўйича олий вакили Жозеп Боррелнинг баёнотида маълум қилинди.

Охирги ҳисоб-китобларга кўра, Венесуэла президентини қўллаб-қувватловчи Ягона социалистик партия етакчилигидаги «Буюк ватанпарварлик қутби» коалицияси 67,7 фоиз овоз олган.

Боррелнинг сўзларига кўра, сайлов минимал халқаро стандартларга мувофиқ ўтмаган. У овоз бериш натижаларини «сиёсий плюрализмга нисбатан ҳурматсизлик» деб атади.

«Мухолифат етакчиларининг сайловдан четлатилиши ва суд томонидан таъқиб қилиниши ЕИга ушбу сайлов жараёни ишончли ва шаффоф, унинг натижалари эса венесуэла халқи иродасини акс эттиришини эътироф этишга имкон бермайди», — деди Боррел.

Аввалроқ сайлов натижаларига асосан Венесуэла президенти Николас Мадуро парламент устидан назоратни ўзига қайтариб олгани маълум қилинганди.