Уй эгалари иситиш печидаги газни очиқ ҳолатда ёққанлиги айтилмоқда.
Фото: AFP/ Barbara Sax
Ҳолат юзасидан Қорақалпоғистон Республикаси прокуратураси Kun.uz мухбирига расмий маълумот берди.
Воқеа кеча, 9 декабр куни содир бўлган. Бу ҳақда Хўжайли тумани ИИБга соат 17:00 да маълумот келиб тушган.
Ёш ота-она ва уларнинг фарзандлари, шу куни уйга меҳмонга келган қариндоши иситиш печидан чиққан газ ҳидидан заҳарланиб оламдан ўтган. Болакайларнинг бири 11, иккинчиси 7 ёшда эди.
Kun.uz мухбирининг манбасига кўра, уй эгалари иситиш печидаги газни очиқ ҳолатда ёққан.
Ҳолат бўйича Хўжайли тумани прокуратураси томонидан терговга қадар текширув ҳаракатлари олиб борилмоқда.
