АҚШнинг янги сайланган президенти Жо Байден ўзи ва сайловолди пойгаси бўйича шериги - бўлажак вице-президент Камала Харрис Time нашри талқинига кўра “Йил одами” деб топилгани учун миннатдорлик билдирди.
Time жорий йил учун “Йил одами” сифатида бирданига икки номзод - Жо Байденни ва вице-президент лавозимини эгаллаётган биринчи аёл Камала Харрисни танлаб олди.
“Мен Камала Харрис билан бирга “Йил одами” деб топилганимиздан “бошим осмонга етди” ва кўплаб атоқли арбоблар киритилган ушбу рўйхатга қўшилганимдан миннатдорман. Барча америкаликлар - пандемияга қарши олд сафларда курашаётганлар ҳам, ирқий адолат қўллаб-қувватлови учун тадбирлар ташкиллаштираётганлар ҳам ирода кучини ва яхшироқ келажакка ишонишини кўрсатиб, жорий йилда юзага келган чақириқларга жавоб беришди”, деб ёзган Байден Twitter’да.
Нашр Байденни “Йил одами” деб топишида у ноябрда ўтган президент сайловларида АҚШнинг 44-президенти Барак Обаманинг рекордини янгилаб, АҚШ тарихида энг кўп овоз тўплаган номзод бўлгани бош омил бўлган.
Time таҳририяти ҳар йил “Йил одами”ни декабрда эълон қилади ва бу номга лойиқ топилган шахс суратини журнал муқовасида жойлаштиради.
Ушбу унвонни бериш учун аниқ мезонлар йўқ, у йил давомида жамиятга, хоҳ салбий, хоҳ ижобий бўлсин, энг катта таъсир кўрсатган одамга берилади.
Америкалик учувчи Чарльз Линдберг тарихда биринчи бўлиб Атлантика океани устидан учиб ўтгани учун 1927 йилда ушбу унвоннинг биринчи соҳибига айланган.
Унвоннинг берилиши тарихи давомида 70 га яқин сиёсий ва жамоат арбоби унга лойиқ топилган. Ўз вақтида у Маҳатма Ганди (1930), Иосиф Сталин (1939, 1942), Уинстон Черчилл (1940, 1949), Елизавета II (1952), Никита Хрушчев (1957), Шарл де Голль (1958), Мартин Лютер Кинг (1963), Генри Киссинжер (1972), оятуллоҳ Руҳаллоҳ Ҳомайний (1979), Лех Валенса (1981), Юрий Андропов ва Роналд Рейган (1983), Михаил Горбачев (1987, 1989), Иоанн Павел II (1994) ва Владимир Путинга (2007) берилган.
Шунингдек, Жеральд Форддан ташқари, Франклин Рузвельтдан бошлаб АҚШнинг барча президентлари ушбу номга сазовор бўлган. Рузвельтнинг ўзи эса “Йил одами”га 3 марта (1932, 1934 ва 1941) лойиқ топилган тарихдаги ягона инсон ҳисобланади.
