BioNTech: коронавируснинг янги штаммига қарши вакцина 6 ҳафтада тайёр бўлади

Германиянинг BioNTech фармацевти лабораторияси тасдиқдан ўтган вакцина коронавируснинг Британияда тарқалган янги штаммига қарши самарали ёки йўқлиги бўйича аниқ бир гап айтиш мушкул эканини маълум қилди.

«Илмий тарафдан олиб қаралса, вируснинг янги штаммларига қарши ҳозирги вакцина билан иммун тизими туриб бера олиши керак. Жорий вакцина янги штаммларга қарши қанчалик самарадорлигини аниқлаш учун маълум тадқиқотлар қилиниши керак. Мабодо вакцина янги версияларга мослаштирилиши керак бўлса ҳам, бунга 6 ҳафтача вақт керак бўлади.

Бизда вакцина янги штаммга қарши тура олиши борасида илмий ишонч бор, бироқ буни тажриба қилмасдан аниқлашнинг имкони йўқ. Тажрибага икки ҳафта вақт керак. Биз албатта тажриба асосида олинган маълумотларни ошкор қиламиз», деган компания ижрочи директори Уғур Шаҳин.

Шундай бўлган тақдирда вакцина қўлланишидан олдин мувофиқлаштирувчи идораларнинг тасдиғидан қайта ўтказилиши зарур.

BioNTech’нинг Pfizer фармкомпанияси билан бирга ишлаб чиқарган вакцинаси жаҳоннинг 45 давлатида тасдиқдан ўтган. Вакцинани маъқуллаган давлатлар орасида АҚШ, Буюк Британия ва Европанинг қатор мамлакатлари бор.

Жаҳон соғлиқни сақлаш ташкилотининг Европа бўлими ўз ходимларини йиғиб, коронавируснинг янги штаммига қарши стратегияни муҳокама қилди.

«Вазиятни диққат билан кузатиб турибмиз. Тест қилиш, тарқалишни камайтириш борасида стратегик қарор қилишга тайёрмиз», деган ЖССТнинг Европа бўлими раҳбари Ҳанс Клюге.